Улаанбаатар, 2025 оны зургаадугаар сарын 2 /МОНЦАМЭ/. Монгол Улсын Ерөнхийлөгч У.Хүрэлсүх Туркменистан Улсын Ерөнхийлөгч Сердар Бердымухамедовыг жанжин Д.Сүхбаатарын талбайд угтаж авлаа.

Төрийн хүндэт харуулын захирагч айлтгал өргөсний дараа хөгжимд хоёр улсын Төрийн дуулал эгшиглэв. Ерөнхийлөгч нар Төрийн ёслолын цэргийн цагаан туганд мэхийн ёсолж, Ерөнхийлөгч Сердар Бердымухамедов Төрийн хүндэт харуулын цэргүүдтэй мэндчиллээ.

Үүний дараа Төрийн тэргүүн нар угтах ёслолд хүрэлцэн ирсэн Монгол Улс болон Туркменистан Улсын албаны төлөөлөгчид, Монгол Улсад суугаа Дипломат төлөөлөгчийн газруудын тэргүүн, Олон улсын байгууллагын суурин төлөөлөгчидтэй мэндчилэв.

Ерөнхийлөгч Сердар Бердымухамедов Төрийн ордны Хүндэт зочны дэвтэрт гарын үсэг зурлаа.

Товч намтар

1981 оны есдүгээр сарын 22-нд Ашхабад хотод төрсөн. 

Боловсрол:

2001 онд  С.А.Ниязовын нэрэмжит Туркменистаны Хөдөө аж ахуйн их сургууль, Үйлдвэрийн инженер

2011 онд ОХУ-ын ГХЯ-ны Дипломатын академийг Олон улсын харилцааны чиглэлээр төгссөн

2011-2013 онд  Женев дэх Аюулгүй байдлын бодлогын төв, Европын болон олон улсын аюулгүй байдлын чиглэлээр мэргэшсэн

2015 онд Техникийн шинжлэх ухааны доктор (PhD)-ын зэрэг хамгаалсан

Ажилласан байдал:

2001 онд Туркменистан Улсын Хүнсний аж үйлдвэрийн холбооны Гадаад эдийн засгийн харилцааны хэлтсийн ахлах мэргэжилтэн

2001-2003 онд Цэргийн алба хаасан

2003-2008 онд Туркменистан Улсын Хүнсний аж үйлдвэрийн холбооны Жимс, хүнсний ногооны үйлдвэрийн ерөнхий газрын ахлах мэргэжилтэн

2008-2011 онд Туркменистан Улсаас ОХУ-д суугаа ЭСЯ-нд зөвлөх

2011-2013 онд Туркменистан Улсаас НҮБ-ын  Женев дэх төв болон олон улсын бусад байгууллагын дэргэд суугаа Байнгын төлөөлөгчийн газрын зөвлөх

2013 онд Туркменистаны ГХЯ-ны Европын орнуудын хэлтсийн дарга

2013 - 2016 онд Нүүрс, устөрөгчийн нөөцийн удирдлага, ашиглалтын асуудал эрхэлсэн агентлагийн дэд дарга

2016-2017 онд Туркменистаны ГХЯ-ны Олон улсын мэдээллийн хэлтсийн дарга

2016-2018 онд Туркменистаны Парламент Межлисын депутат

2018-2019 онд Туркменистаны Гадаад хэргийн дэд сайд

2019-2020 онд Мужийн захирагчийн орлогч, Мужийн захирагч

2020 -2021 онд Аж үйлдвэр, барилгын үйлдвэрлэлийн сайд

2021 оны 2 дугаар сард Сайд нарын танхимын дэд дарга

2021 оны 7 дугаар сард Сайд нарын танхимын эдийн засаг, банк, олон улсын санхүүгийн байгууллагын асуудал эрхэлсэн дэд дарга

2022 оны гуравдугаар сарын 19-ний өдрөөс Туркменистан Улсын Ерөнхийлөгчийн албыг хашиж байна.

Гадаад хэлний мэдлэг: Туркмен, орос, англи.

Туркменистан Улсын Ерөнхийлөгч Сердар Бердымухамедов манай улсад төрийн айлчлал хийхээр дагалдан яваа төлөөлөгчдийн хамт “Буянт-Ухаа” олон улсын нисэх онгоцны буудалд өчигдөр газардсан. Энэхүү айлчлал нь 1992 онд Монгол, Туркменистаны хооронд дипломат харилцаа тогтоосноос хойших хугацаанд Туркменистаны Ерөнхийлөгчийн түвшинд хэрэгжиж буй анхны төрийн айлчлал бөгөөд Монгол Улсын Ерөнхийлөгч У.Хүрэлсүхийн 2024 онд Туркменистан Улсад хийсэн төрийн айлчлалын хариу айлчлал юм. Монгол Улс Туркменистан Улстай 1992 оны дөрөвдүгээр сарын 23-нд дипломат харилцаа тогтоож байв.