Улаанбаатар
Номын баярыг 35 дахь удаагаа тэмдэглэнэ
МОНГОЛЫН МЭДЭЭ | БОЛОВСРОЛ
Улаанбаатар, 2024 оны тавдугаар сарын 16 /МОНЦАМЭ/. УИХ-ын дарга Г.Занданшатарын ивээл дор тэмдэглэж буй 35 дахь удаагийн номын баяр энэ сарын 18-20-нд Сүхбаатарын талбайд болно.
Номын баяр нь нийслэлийнхний олноороо зорин очдог төдийгүй гадны улс орны хэвлэн нийтлэгчид, зохиолч нар, хэвлэлийн агентлагуудын зорин ирдэг баяр болоод байна. Энэ жилийн номын баярын албан ёсны хөтөлбөр монгол, англи хэлээр явагдаж, синхрон орчуулгатайгаар зочдодоо хүргэхээр болсон нь уг баярын олон улсын ач холбогдол өсөн нэмэгдсэнийг илтгэж байна.
Энэ удаагийн номын баярт олон улсын нэр
хүндтэй хоёр агентлагийн төлөөлөгчид “Номын соёлт ертөнц” ТББ-ын урилгаар хүрэлцэн
ирж баярын үеэр Монголын хэвлэлийн компаниудтай биечлэн уулзах юм. Andrew Nurenberg Associates болон Introtema компаниудын төлөөлөгчид “Номын соёлт
ертөнц” ТББ-аас гаргасан Нөхөрлөлийн хөтөлбөрийн хүрээнд бүрэн тэтгэлэг аван
хүрэлцэн ирсэн. Нөхөрлөлийн хөтөлбөр бол олон улсын хэвлэлийн газрууд болон
зуучлагч агентлагуудтай Монголын хэвлэн нийтлэгчдийг холбож, Монголын номын зах
зээлийг дэлхий дахинд таниулах, гадаадын номын үзэсгэлэн яармагт оролцохгүйгээр
номын зохиогчийн эрх авах, монгол зохиолчид өөрсдийн бүтээлийг гадаадын
хэвлэлийн газруудад санал болгох боломжийг бүрдүүлэх зорилготой юм.
Мөн Казахстаны Steppe & World компанийн
төлөөлөгчид олон төрлийн хүүхдийн номыг хэвлэлийн компаниудад санал болгохоор
хүрэлцэн иржээ.
Баярын өдрүүдэд “Номын соёлт ертөнц” ТББ-ын дэргэдэх Редактор клубийн төлөөлөлтэй уулзах, Оюуны өмчийн хуульчаас зөвлөгөө авах, түүнчлэн Номын дэлгүүрүүдтэй хамтран ажиллах, тухайлбал, Мажэстик номын дэлгүүр буюу Номингийн 70 салбарт номоо хэрхэн тавих талаар менежертэй нь уулзах зэрэг олон талт уулзалтын боломж оролцогчдын өмнө нээлттэй байна.
Баярын үеэр уламжлал ёсоор УИХ-ын даргын нэрэмжит “Номын сайн нөхөр” шагналыг гардуулж, Нийслэлийн Засаг дарга бөгөөд Улаанбаатар хотын захирагчийн нэрэмжит “Номын грант” олгох зэрэг ном унших соёлыг дэмжсэн шагнал урамшууллын хөтөлбөр, урлагийн тоглолт, шинэ номын нээлт, “Амьтдын тухай 50 ном”-ын танилцуулга, хөгжөөнт тоглоом, флашмоб зэрэг залуусын санаачилсан сонирхолтой үйл ажиллагаа зохион байгуулах юм.
