Улаанбаатар
Наурыз баярын барилдааны түрүү бөхийг “Соната-9” автомашинаар байлна
МОНГОЛЫН МЭДЭЭ | СПОРТ
Улаанбаатар, 2024 оны гуравдугаар сарын 18 /МОНЦАМЭ/. Казах түмний Наурызын баярт зориулсан улс, аймгийн цолтой 128 бөхийн уламжлалт барилдаан маргааш Монгол бөхийн өргөөнөө болно.
Өнгөрсөн жил тухайн барилдаанд Баян-Өлгийн бөхчүүд зодоглоогүй билээ. “Өлгийн хүчтэн” дэвжээнийхэн эл наадмын үеэр улсын заан Б.Серикийн барилдах эрхийг сэргээж магадгүй гэсэн хүлээлттэй байна. Наурызын баярын барилдааны түрүү бөхийг “Соната-9” автомашинаар байлахаар болжээ.
Өнгөрсөн жил тус барилдаанд улсын аварга П.Бүрэнтөгс түрүүлж байлаа. Харин Баян-Өлгийн бөхчүүдээс улсын өсөх идэр начин Н.Мустафа 2017 онд түрүүлсэн билээ.
Ташрамд дурдахад, өчигдөр Монгол цэргийн өдөр, Орчин цагийн зэвсэгт хүчин үүсэн байгуулагдсаны 103 жилийн ой, Цэргийн төв хэвлэл “Соёмбо” сонины 100 жилийн ойд зориулсан улс, аймгийн цолтой 128 бөхийн барилдаанд Архангай аймгийн Батцэнгэл сумын харьяат улсын начин Л.Отгонбаатар түрүүлж, Дорнод аймгийн Дашбалбар сумын харьяат улсын заан Д.Анар үзүүрлэсэн.
Харин Баянхонгор аймгийн Баянбулаг сумын харьяат улсын
үнэн зоригт харцага Н.Золбоо, Булган аймгийн Сэлэнгэ сумын харьяат улсын начин
Д.Амарсайхан нар их шөвөгт үлдсэн юм.
