Увсын шигшээ баг шигшээ наймд шалгарлаа
МОНГОЛЫН МЭДЭЭ | СПОРТУлаанбаатар /МОНЦАМЭ/. Монголын үндэсний бөхийн холбоо /МҮБХ/ нь СПС телевизтэй хамтран зохион байгуулж буй Үндэсний “Алтан цом”-ын төлөөх цуврал барилдааны 2 дугаар шатны барилдаан пүрэв гарагт эхэллээ.
Энэ барилдаанд Увс
аймгийн баг Баянгол дүүргийн багтай сугалаа тааран өрсөлдсөнөөс Увс аймгийн баг
19:6-аар ялалт байгуулж, шигшээ найман багийн нэгээр шалгарлаа.
Увс аймгийн багт улсын
аварга П.Бүрэнтөгс /4 даваа/, улсын гарди Ө.Бат-Орших /3/, улсын харцага
Т.Баасанхүү /5/, Ц.Мөнхбаяр /3/, улсын начин О.Түмэн /4/ даваатай барилдсан
бол Баянгол дүүргийн багт аймгийн арслан Б.Очирхүү /1/, Г.Дармаажанцан /0/,
Г.Ганбаатар /1/, Х.Энхчулуун /1/, Д.Ням-Очир /3/ даваа авсан юм.
Увсын багаас даян аварга Н.Батсуурь гадаад руу тэмцээнд явсан тул энэ удаагийн барилдааныг өнжиж, аймгийн заан Т.Батсүрэн гэмтлийн улмаас барилдах боломжгүй болж оронд нь улсын гарди Ө.Бат-Орших барилдлаа.
Харин Баянгол дүүргийн багаас аймгийн арслан
Э.Мөнх-Эрдэнэ мөн гадаад руу тэмцээнд явсан тул оронд нь аймгийн арслан
Г.Ганбаатар, аймгийн харцага Б.Түвшинтулга гэмтсэн тул оронд нь аймгийн арслан
Х.Энхчулуун нар орж барилдлаа.
Ялсан баг шагналын 5 сая
төгрөг гардаж авсан бол барилдаад давсан бөхчүүд давааныхаа мөнгөө авлаа.
Өнөөдөр орой 19.00 цагаас
Баян-Өлгий аймгийн баг Дундговь аймгийн багтай өрсөлдөнө.