Улаанбаатар
Монголын бүлэг жуулчид БНСУ-ын Ганвон мужид 15 хүртэл хоног визгүй зорчино
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. БНСУ-ын Засгийн газрын шийдвэрээр Монгол, Вьетнам, Филиппин, Индонез зэрэг зарим улсын бүлэг жуулчид Солонгосын Ганвон мужийн Яньян олон улсын нисэх онгоцны буудлаар дамжин 15 хүртэл хоног визгүй зорчих боломжтой боллоо.
Энэхүү шийдвэр нь 2022 оны 10 дугаар сарын 1-ний өдрөөс 2023 оны 5 дугаар сарын 31-ний өдрийг хүртэл хүчин төгөлдөр үйлчилнэ.
Дээрх шийдвэрт Монгол Улсын 5 буюу түүнээс дээш хүний бүрэлдэхүүнтэй бүлэг жуулчид хамаарах бөгөөд дараах шаардлага тавигдах аж.
-Аялал жуулчлалын агентлагаар дамжуулан аяллын хөтөлбөр төлөвлөсөн байх,
-Зөвхөн Яньян олон улсын нисэх онгоцны буудалд нэг авиакомпанийн нислэгээр бүгд ирж, бүрэн бүрэлдэхүүнээрээ эх орондоо буцах,
-Коронавируст халдвар /Ковид-19/-ын эсрэг вакцины бүрэн тунд хамрагдсан байх, халдвар хамгааллын дэглэмийг чанд мөрдөх,
-Орон нутгийн ажилтан дагалдах бол түүнтэй холбоотой үйлчилгээний хөлс төлөх, хилээр нэвтрэхэд хувийн болон шаардлагатай бусад мэдээллээ өгөхийг зөвшөөрсөн байх,
-Зөвхөн Ганвон мужид аялах боломжтойг анхаарах зэрэг болно.
-Ганвон мужийн Яньян олон улсын нисэх онгоцны буудлаар дамжин БНСУ-д 15 хүртэл хоног визгүй зорчихдоо Total Asia, Airman, Chandmani consulting, Airmarket Holiday, PSW, Juulchin, Joy Mongolia Travel, New Juulchin, Let’s travel, IHC гэсэн компанийн шугамаар зорчих тухай БНСУ-ын ЭСЯ-наас монголын талд мэдэгджээ. Зорчихтой холбоотой дэлгэрэнгүй мэдээллийг БНСУ-ын ЭСЯ болон дээрх компаниудаас авах юм байна.
Энэхүү хөнгөлөлттэй нөхцөлөөр Солонгост визгүй зорчсон хэдий ч тус улсын нутаг дэвсгэрийг орхин гараагүй, хугацаа хэтрүүлсэн иргэдийн тоо зорчсон нийт монгол иргэдийн 5 хувиас давсан даруйд уг шийдвэр цуцлагдах тул ГХЯ-наас иргэдийг хариуцлагатай, ухамсартай аялахыг уриалж байна.
Эх сурвалж: ГХЯ
