Зам тээврийн ослын шинжтэй 392 дуудлага бүртгэгджээ

МОНГОЛЫН МЭДЭЭ | ХУУЛЬ
bolor@montsame.mn
2022-07-14 14:33:43

Улаанбаатар /МОНЦАМЭ/. Тээврийн цагдаагийн албаны Жижүүрийн шуурхай удирдлагын төвд нийт 675 дуудлага мэдээлэл хүлээн авснаас зам тээврийн ослын шинжтэй 392 дуудлага мэдээлэл бүртгэгджээ.


Бүртгэгдсэн зам тээврийн ослын улмаас нийслэлд 18 хүн, орон нутагт 7 хүн гэмтэж нийт 25 хүн гэмтэж бэртсэн. Ослын улмаас нийслэлд хүний амь хохироогүй, орон нутагт 6 хүний амь хохирсон байна.

Баяр наадмын өдрүүдэд зам тээврийн ослын улмаас 6 хүний амь хохирсноос 1 нь хүүхэд аж.

Нийслэлд:

- Явган зорчигч хэлбэрээр 8 хүн гэмтсэнээс, 4 хүүхэд гэмтэж бэртсэн байна.
- Мөргөлдөх хэлбэрээр 4 хүн гэмтсэн.
- Мотоциклтой 1 хүүхэд гэмтсэн
- Зорчигч 3 хүн гэмтэж бэртсэн байна.

Орон нутагт

- Мөргөлдөх хэлбэрээр 5 хүн гэмтсэнээс 1 хүүхэд гэмтсэн. 5 хүний амь хохирсон
- Онхолдох хэлбэрээр 2 хүн гэмтэж, 1 хүний амь хохирсон. Тухайлбал, 2022.07.13 11.05 цагт Төв аймаг Баян суманд Х.Саното-8 автомашин Т.Highlander автомашин мөргөлдсөн зам тээврийн осол гарч 3 хүний амь хохирч, 3 хүн гэмтэж бэртсэн байна.

Гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 329 зөрчлийг илрүүлж, учирч болох эрсдэлээс урьдчилан сэргийлжээ. 

Согтууруулах ундааны зүйл хэрэглэсэн үедээ хөдөлгөөнд оролцож осолд холбогдсон тохиолдол 9 бүртгэгдсэнээс жолооч-5 холбогдож, явганаар 4 хүн зам тээврийн осолд холбогдсон байна.

Баяр наадмын өдрүүдэд нийслэл аймгийн цагдаагийн газрын бие бүрэлдэхүүн хамрагдан цагийн менежментийн дагуу 24 цагаар орон нутгийн замд хяналт шалгалт хийж ажиллан иргэдийнхээ амар тайван ая тухтай зорчих нөхцлийг ханган ажиллаж байна.

Баяр наадмын өдрүүдэд орон нутгийн замд зорчих тээврийн хэрэгслийн хөдөлгөөний эрчим нэмэгдэж байгаа тул иргэд жолооч та бүхэн архи согтууруулах ундааны зүйл хэрэглэхгүй байх, хэт ядарсан нойр дутуу үедээ тээврийн хэрэгсэл жолоодохгүй байх, мөн жолооч биш жолоодох эрхийн үнэмлэхгүй хүнээр тээврийн хэрэгсэл жолоодуулахгүй байхад анхаарч хөдөлгөөнд оролцохыг цагдаагийн байгууллагаас анхааруулж байна гэж ТЦА-наас мэдээллээ. 

Холбоотой мэдээ