Улаанбаатар
Нийслэлийн ЕБС-ийн сэтгэл зүйчдийн чадавхыг бэхжүүлнэ
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. Нийслэлийн Боловсролын газар Цагдаагийн ерөнхий газрын Хар тамхитай тэмцэх газар, Мета сэтгэл судлалын хүрээлэнтэй хамтран нийслэлийн ерөнхий боловсролын сургуулийн сэтгэл зүйчдийн чадавхыг бэхжүүлэх сургалт зохион байгууллаа.
Нийслэлийн
Боловсролын газрын дарга Ж.Гантулга сургалтыг нээж хэлсэн үгэндээ,
“Коронавируст цар тахлаас шалтгаалан хичээл сургалтын үйл ажиллагаа зайн
хэлбэрт шилжсэнтэй холбоотой өсвөр насны суралцагчдад сэтгэл зүйн тогтворгүй
байдал үүсэж ганцаардах, бухимдах зэрэг сэтгэл гутралын шинж тэмдэг ажиглагдаж
байна. Иймд суралцагчдад чиглэсэн сэтгэл зүйн тусламж, үйлчилгээ үзүүлэх ажлыг
зохион байгуулах хэрэгцээ, шаардлага бидний өмнө тулгарч, энэ хичээлийн жилээс
ерөнхий боловсролын сургуулиудад мэргэжлийн сэтгэл зүйчдийг ажиллуулж эхэлсэн.
Цаашид бүх ерөнхий боловсролын сургуулиудад сэтгэл зүйчтэй болгох бодлогыг
баримтлан ажиллаж байна” хэмээн онцоллоо.
Сургалтад Цагдаагийн ерөнхий газар, Хар тамхитай тэмцэх газрын урьдчилан сэргийлэх хамтын ажиллагааны хэлтсийн ахлах мэргэжилтэн М.Зоригтбаатар, сэтгэл зүйч О.Оюунбилэг “Мансууруулах эм, сэтгэцэд нөлөөт бодистой холбоотой гэмт хэргийн нөхцөл байдал, хор уршиг, хэрэглэгч, донтогч нарын сэтгэл зүй” сэдвээр мэдээлэл өгсөн бол “Мета сэтгэл судлалын хүрээлэн”-гийн гүйцэтгэх захирал Г.Баярмаа “Сэтгэл зүйчийн үйл ажиллагааны хэрэгжилт, одоогийн байдал”, “Сэтгэл зүйч өөрийн сэтгэл зүйд хэрхэн анхаарах, сэтгэцийн эрүүл мэндийг хамгаалах” талаар аргазүйн зөвлөгөө өгч илтгэл тавив.
