Вакцины хоёр тунд хамрагдсан иргэдийг орон нутаг чөлөөтэй зорчуулахаар шийдвэрлэв

Монголын мэдээ | Улс төр
ariunbold@montsame.mn
2021-04-30 07:56:51

Улаанбаатар /МОНЦАМЭ/. Улсын Онцгой комиссын ээлжит хурал цахимаар боллоо.


Хурлаар коронавирусний халдварын цар тахлын эсрэг хэрэгжүүлж буй ажлын талаарх цаг үеийн мэдээлэл сонсож, дархлаажуулалтын явц, вакцин захиалга, татан авалтын хуваарь, тавдугаар сарын эхний өдрүүдэд гүйцэтгэхээр төлөвлөсөн ажлуудын талаар хэлэлцэж, гишүүд санал солилцов.


Улсын хэмжээнд зорилтот бүлгийн иргэдийн 40 орчим хувийг дархлаажуулалтад хамруулсан бол ирэх сарын 10-наас 21 аймагт дархлаажуулалтыг өргөн хүрээнд зохион байгуулж, богино хугацаанд орон нутгийн зорилтот бүлгийн иргэдийг дархлаажуулалтын нэгдүгээр тунд хамруулахаар болов. БНХАУ-аас авч буй вакцины татан авалт хуваарийн дагуу үргэлжилж байна.


Нийслэлд суурин 120, явуулын 40 цэгт 18-аас дээш насны иргэдийг харьяалал харгалзахгүй вакцинжуулж байна. Хилийн боомт орчмын орон нутаг дахь иргэдийг тавдугаар сарын 10-ны дотор вакцины хоёрдугаар тунд хамруулж дуусгах аж.


Дархлаажуулалтад бүрэн хамрагдсан буюу вакцины хоёр тунгаа тариулаад 14 хоног болсон болон халдвар аваад эдгэсэн иргэдийг хот хоорондын зорчих хөдөлгөөнд ороход хориглохгүйгээр журамлаж, ирэх сарын 5-наас мөрдөхөөр болов.


Харин ирэх сарын 10-наас улс хоорондын ачаа болон зорчих тээвэрлэлтийг хэвийн горимд шилжүүлэх, хил нээх бэлтгэл нөхцөлийг ханган Засгийн газрын хуралдаанаар шийдвэрлүүлэх саналыг комиссын гишүүд дэмжлээ.

Холбоотой мэдээ