Улаанбаатар
“Нэг хаалга-Нэг шинжилгээ”-нд давхардсан тоогоор 170 мянга гаруй өрх хамрагджээ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Гамшгаас хамгаалах бүх нийтийн бэлэн байдлын зэрэгт шилжсэн хугацаанд нийслэл Улаанбаатар хотод иргэдийн дундах халдварын нөхцөл байдлыг тодруулах зорилгоор “Нэг хаалга-Нэг шинжилгээ” тандалтын талаар Эрүүл мэндийн яамнаас мэдээллээ.
Энэ хүрээнд энэ сарын 11-14-ний дөрөв хоногт нийт 109,068 өрхөөс шинжилгээ авч 17 хүнээс халдвар илрүүлээд байна. Үүний 11 нь эхний гурван өдөрт илэрсэн бол дөрөв дэх өдөр тэдгээрийн ойрын хавьтал бүхий гэр бүлийн 6 хүнээс халдвар нэмж илэрлээ. Ийнхүү уг шинжилгээгээр халдварын нийт 17 тохиолдол бүртгэгдээд байна.
Харин
төрийн 808 байгууллагын 62 мянга 646 иргэнийг шинжилгээнд хамруулахад халдвар
илрээгүй. Иймд давхардсан тоогоор нийтдээ 171 мянган өрхөд шинжилгээ хийгээд
байна. Одоо үлдсэн 240 мянган өрхөөс 9 хоногт багтаан “Нэг хаалга-Нэг
шинжилгээ”-г авахаар ажиллаж байна. Шинжилгээг доорх хуваарийн дагуу хийж
гүйцэтгэнэ/хавсралт зургаас харна уу/.
Мөн
иргэдийн хүнсний хангамжийг тасалдуулахгүй, хүнсний дэлгүүрүүдийн нөөцийг
бүрдүүлэх зорилгоор зарим арга хэмжээг авч хэрэгжүүлэхээр боллоо.
Тодруулбал Засгийн газрын тогтоолын
дагуу Улаанбаатар хотын дарга захирамж гаргаж 2021 оны 2 дугаар сарын 16-наас
хүнсний бөөний төвүүд болон хүнсний үйлдвэрлэл, түгээлтийн салбарын үйл
ажиллагааг тусгай горимын дагуу, хуваариар шат дараатай нээж байна. Ингэхдээ
тус салбарын нийт ажиллагсдын 15 хувийг ПСР шинжилгээнд хамруулснаар үйл
ажиллагааг нь нээх юм. Энэ ажиллагсдыг шинжилгээнд хамрагдах нөхцлөөр
хангаж, тусгай байршлуудад дараах хуваарийн дагуу хамруулахаар бэлтгэл хангаад
байна/шинжилгээ өгөх цэгүүдийн байршил цагийн хуваарийг хавсаргав/. Дүүрэг бүрт байгаа шинжилгээний цэгүүд таны
гэрээс хол бол хүнсний салбарт ажилладаг гэдэг ажлын үнэмлэх, иргэний үнэмлэхээ
үзүүлээд хувийн унаагаар шинжилгээний цэгт очиж өгч болно.
Үйл
ажиллагаа нь нээгдсэн хүнсний захуудаар жижиглэнгийн хүнсний дэлгүүр,
супермаркетийн худалдаа эрхлэгчид үйлчлүүлж, бараа татан авалтаа хийх юм.
Харин иргэд та бүхэн гэрийн ойролцоох дэлгүүр, хүнсний бөөний төвөөр үйлчлүүлэхдээ халдвар хамгааллын дэглэмээ дагаж мөрдөхийг уриалж байна.
