Улаанбаатар
Коронавирусээр халдварлагсдын 21 хувьд хуурай ханиалгах шинж тэмдэг илэрч байна
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. ЭМЯ-ны өнөөдрийн хэвлэлийн хурлын үеэр ХӨСҮТ-ийн Тандалт судалгааны албаны дарга А.Амбасэлмаа коронавирусээр халдварласан хүмүүст илэрч буй эмнэл зүйн шинж тэмдгийг танилцууллаа.
Нийт батлагдсан тохиолдолд хуурай ханиалгах шинж тэмдэг 21 хувьд, 9-12 хувьд нусгайрах, хамар битүүрэх, толгой өвдөх, хоолой хөндүүрлэх, 4-7 хувьд жихүүдэс хүрэх, амт, үнэр мэдрэхгүй болох, 1-2 хувьд нүд улайх, дотор муухайрах, үе мөч өвдөх, хоолонд дургүй болох, суулгах, хамар, хоолой хуурайших, ядрах шинж тэмдэг илэрч байгаа аж.
Коронавирусээр 2-90 насныхан өвчилсөн бөгөөд дундаж нас 33.2 байна. 15 хүртэлх насны 75 хүүхэд эмчлүүлж байгаагаас 9 хүртэлх насны 30 хүүхэд байгаа аж. Нэг настай хоёр, 2 настай 3 хүүхэд, 70-аас дээш насны 9 хүн, 80, 81 настай 3 хүн, 90 настай 1 хүн эмчлүүлж байна.
Тэрбээр энэ үеэр “ХӨСҮТ болон Цэргийн төв эмнэлгийн эмч нар хүмүүсийнхээ эрүүл мэндийн төлөө цаг наргүй ажиллаж, маш хүнд хүнээ тогтвортой эмчилж байгаа”-г дурдсан юм.
