Шүүхийн ерөнхий зөвлөлийн гишүүнээр Д.Цогтсайханыг томиллоо

МОНГОЛЫН МЭДЭЭ | ХУУЛЬ
ariunbold@montsame.gov.mn
2020-06-22 14:33:41

Улаанбаатар /МОНЦАМЭ/. Ерөнхийлөгч Х.Баттулга зарлиг гаргаж, Дашнямын Цогтсайханыг Шүүхийн ерөнхий зөвлөлийн гишүүнээр томилжээ. Ерөнхийлөгчийн зарлигийг Шүүхийн ерөнхий зөвлөлийн дарга, гишүүд болон Ажлын албаныханд  тус зөвлөлийн Тамгын газрын дарга С.Билгүүн уншиж сонордууллаа.


Энэ үеэр Шүүхийн ерөнхий зөвлөлийн гишүүн Д.Цогтсайхан талархал илэрхийлээд “Шүүхийн бие даасан, шүүгчийн хараат бус байдлыг хангах Үндсэн хуулийн чиг үүрэг бүхий шүүхийн захиргааны байгууллагын бүрэлдэхүүнд ажиллах мөрийн  хөтөлбөрийг маань Давж заалдах шатны шүүхийн шүүгчдийн олонх нь дэмжиж Шүүхийн ерөнхий зөвлөлийн гишүүнээр томилуулахаар санал болгож, Монгол Улсын Ерөнхийлөгч томилсонд баяртай байна. Үндсэн хуульд заасан шүүхийн бие даасан, шүүгчийн хараат бус байдлыг хангах чиг үүрэг болон Монгол Улсын шүүх, хэргийн хөдөлгөөний менежментийг боловсронгуй болгох, хөгжүүлэх, шүүхэд итгэх иргэдийн итгэлийг дээшлүүлэх чиглэлээр өөрийн мэдлэг боловсрол, туршлагаа дайчлан ажиллана” хэмээв.


 Дашнямын Цогтсайханы намтар:

1973-1983 онд Өмнөговь аймгийн арван жилийн 1 дүгээр дунд сургууль,

1983-1988 онд МУИС-ийн хууль зүйн сургууль.

1988 онд Дорноговь аймгийн шүүхэд дадлагажигч ажилтан,

1988-1991 онд Дорноговь аймгийн ардын хэсгийн /хуучнаар/ 5 дугаар шүүхэд шүүгч,

1991 онд Хууль зүйн яамны Шүүхийн зохион байгуулалтыг удирдах газарт зааварлагч,

1991-1996 онд "Билгүүн" ББХК-д хуулийн зөвлөх,

1996-2001 онд Дорноговь аймгийн шүүхийн шүүгч,

2001-2006 онд Дорноговь аймаг дахь сум дундын 2 дугаар шүүхийн шүүгч, Ерөнхий шүүгч,

2006-2008 Нийслэлийн Сонгинохайрхан дүүргийн шүүхийн шүүгч, Ерөнхий шүүгч,

2008-2013 онд Нийслэлийн Чингэлтэй дүүргийн шүүхийн  шүүгч, Ерөнхий шүүгч,

2013-2015 онд Дүүргийн эрүүгийн хэргийн анхан шатны 1 дүгээр шүүхийн шүүгч,

2015 оны 7 сараас Нийслэлийн Иргэний хэргийн давж заалдах шатны шүүхийн шүүгчийн албан тушаалд ажиллаж байна.

Холбоотой мэдээ