Холимог тулаанаар 7 орны шилдгүүд Улаанбаатарт хүчээ сорино
МОНГОЛЫН МЭДЭЭ | СПОРТУлаанбаатар /МОНЦАМЭ/. Холимог тулааны “MFC” холбооноос 2020 оны хоёрдугаар сарын 1-ний өдөр “АСА Цирк”-т энэ жилийн анхны олон улсын тэмцээнийг Монгол Улсын Ерөнхий сайд У.Хүрэлсүхийн ивээл дор зохион байгуулна.
Тэмцээний оргил тулаанд БНСУ-ын “Road FC” холбооны тамирчин, “MFC” холбооны хөнгөн жингийн аварга М.Нандин-Эрдэнэ, АНУ-ын “Dragon House” холбооны аварга Н.Отгонбаатар нар /70 кг-д/ тулалдах юм. Мөн энэ өдөр АНУ-ын “Dragon House”, Монголын “MGL-1” холбооны дунд жингийн аварга Д.Батсүмбэрэл, Японы тамирчин Такаяши Ямашита /77 кг-д/ болон “Ангууч” хочит Б.Баттөр, Японы тамирчин Таказүми Моритой /66 кг-д/ хүчээ сорин тулалдах юм.
Японы тулаанчдаас гадна
АНУ, Ямайка, Тажикистан, ОХУ, Казахстанаас холимог тулааны шилдэг тамирчид ирнэ.
Тухайлбал, “MFC-1” тэмцээнд оролцож байсан Казахстаны тамирчин Магомед
Кабардиев дахин ирж Э.Даваабаяртай тулалдана. Дагестан гаралтай Магомед нь
“UFC”-ын аварга Хабиб Нурмагомедовтой ойрын хамаатан аж. АНУ-ын тулаанч Ламар
Госи, монгол тулаанч Т.Ариунболдтой тулалдах саналаа өгсөн байна. Мөн “MFC”
холбоонд 2 ч ялалт байгуулаад амжсан А.Гантүлхүүр, 3-1 гэсэн амжилттай яваа
Тажикистаны тамирчин Маруф Сафаровтой, БНСУ-ын “Road FC” холбоонд тулалдаж
явсан Б.Бүрэнзориг, Ямайкийн Мэттью Колкүүнтэй, “MFC-1”-ийн оргил тулаанд манай
тамирчин Б.Азжавхланг ялсан ОХУ-ын Тува улсын тулаанч Иргит Овээнчи,
А.Тэмүүлэнтэй тус тус хүч үзнэ. “MFC-3” холимог тулааны олон улсын тэмцээний
тасалбар ирэх долоо хоногоос худалдаанд гарах аж.