Томуугаар өвчлөгсдийн 88.6 хувийг 0-15 насны хүүхэд эзэлж байна

ОРОН НУТГИЙН МЭДЭЭ | ХОВД
lkhagwa@montsame.gov.mn
2020-01-09 15:39:14

Ховд /МОНЦАМЭ/. Томуу, томуу төст өвчний долоон хоногийн тандалтын мэдээллийг Ховд аймгийн Эрүүл мэндийн газраас тодрууллаа. 

Ховд аймгийн Эрүүл мэндийн салбарт 23 байгууллага үйл ажиллагаа явуулж байна. Тус байгууллагуудын нэгдсэн мэдээгээр 12 дугаар сарын 30-ны өдрөөс 1 дүгээр сарын 6-ны өдөр хүртэлх хугацаанд амбулаторийн нийт үзлэгээр 4135 хүн үйлчлүүлсэн аж.

Үүнээс томуу, томуу төст өвчнөөр өвчилсөн 627 иргэн байгаа нь өмнөх 7 хоногоос 23 тохиолдлоор нэмэгдсэн үзүүлэлт юм. Үүнд амьсгалын замын хүндрэлтэй 72 тохиолдол бүртгэсэн байна.

Долоо хоногийн хугацаанд бүртгэсэн томуу, томуу төст өвчний 627 тохиолдлын 556 нь 0-15 насны хүүхэд байна. Энэ нь нийт томуугаар өвчилсөн иргэдийн 88.6 хувийг эзэлж байгаа гэнэ. 

Аймгийн хэмжээнд 248 дуудлага ирснээс 61 дуудлага нь томуу, томуу төст өвчний дуудлага байжээ.

Эмнэлэгт суурилсан тандалтын мэдээгээр Бүсийн оношилгоо эмчилгээний төвд 12 дугаар сарын 30-наас 1 дүгээр сарын 6-ны өдөр хүртэлх хугацаанд уушгины хатгаагаар 35 хүн хэвтэн эмчлүүлсэн байна. Иймд иргэд томуу, томуу төст өвчнөөс урьдчилан сэргийлэхийг мэргэжлийн байгууллагууд уриалав.

                                  Зөвлөмж... 

Томуу, томуу төст өвчин нь вирүсээр үүсдэг амьсгалын цочмог халдварт өвчин юм.

Амьсгалын замын цочмог халдварт өвчин нь халуурах, толгой өвдөх, ханиалгах, хамраас нус гоожих, үе мөч, булчингаар өвдөх буюу ерөнхий хордлогын шинжээр илэрдэг аж.

Ханиад томуу болон агаар дуслын замаар халдварладаг өвчнүүдээс урьдчилан сэргийлэх хамгийн чухал арга бол дархлаажуулалт юм.

Тиймээс бага насны хүүхдийн эрүүл мэндэд онцгой анхаарч, ханиад томуунаас урьдчилан сэргийлэх бусад арга замыг хүргэж байна.

Томуу, томуу төст өвчнөөс хэрхэн сэргийлэх вэ?

Өвчлөлөөс сэргийлэх хамгийн сайн хамгаалалт нь биеийн эсэргүүцэл сайн байх явдал тул амин дэмтэй, чанартай хоол идэх, биеийн тамирын дасгал хөдөлгөөнийг эрхэмлэн, ажил амралтаа зохицуулж, хангалттай амрах

Улирлын байдалд тохируулан хувцаслах, хүйтэнд малгай, ороолт, бээлий хэрэглэх

Шаардлагагүй тохиолдолд олон нийтийн газар явахгүй байх

Хамрын салстад сонгино, сармисны тосон ханд, оксолины тос түрхэх

Гичтэй бүлээн усанд хөлөө 5-10 минут дүрж, хөлийн уланд тосон иллэг хийх

Жимс болон шүүс, витамин С хэрэглэх

Өдөрт 2-3 хумс саримсыг хоол ундандаа хэрэглэх

Томуу, томуу төст өвчнөөс сэргийлэх цэгчилсэн иллэг хийх

Царван, морин шарилжны ханд, содтой болон давстай ус, тамидин зэрэг уусмалаар хоолойгоо тогтмол зайлж хэвших

Гэр, сургууль, цэцэрлэг, ажлын байранд цэвэр агаар оруулж, өдөрт чийгтэй цэвэрлэгээг 2-оос доошгүй удаа хийх зэрэг энгийн аргуудыг хэрэглэх.

Үүнээс гадна ТТТӨ-нөөс сэргийлэх үндсэн гол арга бол томуугийн эсрэг сайн дурын дархлаажуулалтад хамрагдах явдал юм. Ялангуяа 2-15 хүртэлх насны хүүхэд, өндөр настан, уушгины архаг суурь өвчтэй хүмүүс хамрагдвал илүү ач холбогдолтой.

Томуу, томуу төст өвчний шинж тэмдэг илэрвэл яах вэ?

Эмнэлэгт яаралтай хандаж, эмчийн зөвлөгөөг ягштал баримтлан хэвтрийн дэглэм сахиж, хамт олон, найз нөхдөдөө халдвар тараахгүйн тулд эмчийн магадалгаа авч, гэртээ эмчлүүлээрэй.

Халуун аарц, чацарганын шүүс, саримстай хар шөл зэрэг шингэнийг түлхүү хэрэглэх

Амны хаалт байнга зүүж хэвших

Гараа сайтар савандаж угааж хэвших, хүүхдийн тоглоом, аяга, халбага болон шүдний сойзыг өдөр бүр содын уусмалаар ариутгах

Үзвэр үйлчилгээ, олон нийтийн газар, сэлгүүцэхгүй байх

Томуу, томуу төст өвчний үед эмийг эмч болон эм зүйчийн өгсөн зааврын дагуу хэрэглэх, дур мэдэн антибиотик хэрэглэхээс зайлсхийх гэх мэт.


 

Холбоотой мэдээ