Улаанбаатар
Малчдад 11 тэрбум 585.9 сая төгрөгийн зээл олгожээ
МОНГОЛЫН МЭДЭЭ | ЭДИЙН ЗАСАГ
Засгийн газраас санаачлан хэрэгжүүлж буй “Сайн малчин” хөтөлбөрийн хүрээнд энэ сарын 07-ны байдлаар Төрийн банк 3356 малчинд 11 тэрбум 585.9 сая төгрөгийн зээлийг жилийн 10 хувийн хүүтэй олгосон талаар Монголбанк мэдээлэв.
Өнгөрсөн сарын 15-наас хэрэгжиж эхэлсэн уг хөтөлбөрт хамрахаар нийт 5357 малчин 18 тэрбум 720.3 сая төгрөгийн зээлийг жилийн 10 хувийн хүүтэйгээр авах хүсэлт ирүүлжээ. Төрийн банк хүсэлтүүдийг нягтлан 3356 малчинд зээл олгосон байна.
29.5 хувийн хүүтэй байсан малчны зээлийн хүүг бууруулах зорилго бүхий “Сайн малчин” хөтөлбөр амжилттай хэрэгжиж энэ оны 2 дугаар сарын 05-нд хүүг 18 хувь болгосон. Улмаар хөтөлбөрийн 2 дугаар шат амжилттай хэрэгжиж энэ сарын 15-нд зээлийн хүү 10 хувьд шилжээд байгаа юм. 10 хувийн хүүтэй зээл авах хүсэлтэй малчид Эрүүл мэнд, Нийгмийн даатгал төлдөг байх, малаа тарилга, туулга, вакцинжуулалтад бүрэн хамруулсан байх, "Малчин данс"-аа байнга ашигладаг байх зэрэг шаардлагыг хангасан байх ёстой юм.
Ч.Ариунболд
