Монгол, БНСУ-ын гарааны бизнесүүдийн хамтын ажиллагааг идэвхжүүлнэ

МОНГОЛЫН МЭДЭЭ | ГХЯ-НЫ МЭДЭЭ
ariunbold@montsame.gov.mn
2019-06-28 16:01:04

Улаанбаатар /МОНЦАМЭ/. Гадаад харилцааны дэд сайд Б.Батцэцэг БНСУ-ын жижиг, дунд үйлдвэр, гарааны бизнесийн яамны дэд сайд Ким Хаг Дутай уулзаж, хоёр улсын худалдаа, хөрөнгө оруулалт, эдийн засгийн хамтын ажиллагааг эрчимжүүлэх, жижиг, дунд үйлдвэрлэлийн хамтын ажиллагааг өргөжүүлэх асуудлаар санал солилцов.


Дэд сайд нар хоёр улсын хувийн хэвшил, гарааны бизнесүүд хоорондын хэлхээ холбоо, хамтын ажиллагааг идэвхжүүлэхэд Засгийн газрын түвшинд үргэлжлүүлэн анхаарч, нягт хамтран ажиллах талаар санал нэгдэв. БНСУ-ын тал манай хоёр улсын жижиг, дунд үйлдвэрлэлийн асуудлыг хариуцсан яам хоорондын хамтын ажиллагааны Санамж бичгийг шинэчлэн байгуулах, гарааны бизнесүүдийн санал санаачлагыг дэмжих зорилгоор залуу бизнесүүдийн хооронд тэмцээн зохион байгуулах санал тавилаа.


Гадаад харилцааны дэд сайд Б.Батцэцэг манай жижиг, дунд үйлдвэрлэгчдийн бараа бүтээгдэхүүнийг БНСУ болон гуравдагч зах зээлд гаргах, тус салбарт хэрэгжүүлж буй мэдээлэл, технологийн тогтолцоог Монгол Улсад нэвтрүүлэхэд хамтран ажиллах сонирхолтой байгаагаа илэрхийлэв.

Холбоотой мэдээ