Ерөнхий сайдын нэрэмжит шагнал гардууллаа

ОРОН НУТГИЙН МЭДЭЭ | СҮХБААТАР
odonchimeg@montsame.mn
2019-01-29 11:54:12

Сүхбаатар /МОНЦАМЭ/. Монгол Улсын Еөрнхий сайд У.Хүрэлсүх 01 дүгээр сарын 28-нд их жанжин Д.Сүхбаатарын хөшөөнд цэцэг өргөн хүндэтгэл үзүүллээ. Үүний дараа Жаахан шарга театрт төрийн албан хаагчидтай уулзаж, эрхэлсэн ажилдаа өндөр амжилт гаргасан эрүүл мэнд болон боловсролын салбарын тэргүүний ажилчдад Ерөнхий сайдын нэрэмжит шагнал гардуулав.


Тэрээр уулзалтын эхэнд хэлсэн үгэндээ, “Ерөнхий сайдын ажлыг аваад улс орны эдийн засгийг сэргээх, төрийн албаны сахилга, хариуцлагыг сайжруулахад голлон анхаарч ажилласан. Үүний үр дүн ч гарч байгаа. Анх засаглал авах үед улс орны эдийн засаг хүнээр яривал сэхээнд байгаа өвчтөн шиг л байсан. Зөв бодлогын үр дүнд 2018 оны жилийн эцсийн үзүүлэлтээр эдийн засгийн бүх үзүүлэлтүүд өссөн, гадны улс орнуудад манай улсын нэр хүнд өслөө. Цаашид бид яг л энэ эрчээрээ ажиллах болно. Үүний тулд төрийн албан хаагчид та бүхэн ажилдаа чин сэтгэлээсээ хандаж, иргэдийн татвараар цалинжиж байгаа учир хүн бүрт тэгш үйлчлэх ёстой. Төрийн бодлого шийдвэрийг орон нутагт хэрэгжүүлэгч, иргэдэд хүртээгч нь та бүхэн. Тиймээс иргэн бүртэй тэгш харьцаж, төрийн хүн гэдгээ ямагт санаж яв. Мөн элдэв авилга, хахуулиас ангид байхыг онцгойлон анхааруулж байна. Хэрвээ төрийн албанд байж мөнгөжих, баяжихыг хүсч байгаа бол одоо шууд ажлаа өгөөд хувийн хэвшилд очиж ажиллах хэрэгтэй.” гэдгийг онцгойлон анхааруулав.

Уулзалтын дараа Монгол Улсын Ерөнхий сайдын нэрэмжит шагналыг 10 багш, есөн эмч, сувилагчид гардуулсан юм.


Ерөнхий сайдын нэрэмжит шагнал хүртсэн Баруун-Урт сумын Нэгдүгээр БДС-ийн багш Д.Амаргариг, “Би 10 гаруй жил боловсролын салбарт ажиллаж байна. Үндэсний бичиг үсгээ хүүхэд багачуудад өвлүүлэн үлдээх, сурталчилан таниулах, түгээн дэлгэрүүлэх ажилд голлон анхаардаг. Энэ зорилго маань ч биеллээ олж шавь нарын ур чадвар жилээс жилд нэмэгдэж, аймагтаа төдийгүй улсдаа өндрөөр үнэлэгдсэн чадварлаг сурагчид төрөн гарч байгаад багш хүний хувьд баяртай байдаг. Хамгийн сүүлийн амжилт гэвэл "Монголын сайхан бичигтэн" улсын уралдаанд бэлтгэсэн сурагч А.Мөнхтөр тэргүүн байр, Ө.Сайнцэцэг гуравдугаар байр, Монгол туургатны "Миний монгол бичиг" улсын уралдаанаас миний бие гран при хүртсэн. Мөн бусад улс бүсийн чанартай томоохон тэмцээн уралдаанаас шавь нар болон анги хамт олноороо шагналт байранд шалгарсан сайхан амжилтуудыг үзүүлээд байна. Энэ бүх амжилт, хичээл зүтгэлийг минь үнэлж Ерөнхий сайдын нэрэмжит шагналд тодорхойлсон хамт олондоо баярлалаа. Ерөнхий сайдын нэрэмжит шагналыг өөрийнх нь гараас гардан авсандаа маш их баярлаж, урам зориг авлаа. Цаашид илүү их хичээх болно” гэж ярилаа.

 

Холбоотой мэдээ