Улаанбаатар
ХӨСҮТ-ийн гадна талбай нисдэг тэрэгний зогсоолтой болов
МОНГОЛЫН МЭДЭЭ | ЭРҮҮЛ МЭНДУлаанбаатар /МОНЦАМЭ/. Халдварт өвчин судлалын үндэсний төв /ХӨСҮТ/-ийн гадна зам, талбайн тохижилтын ажлыг дуусган өнөөдөр ашиглалтад хүлээлгэж өглөө.
Нийслэлийн Засаг даргын мөрийн хөтөлбөр, Нийслэлийн эдийн
засаг-нийгмийг хөгжүүлэх үндсэн чиглэлийн хүрээнд Улаанбаатар хотын Захирагчийн
ажлын албанаас эмнэлгийн байгууллагуудын гадна зам, талбайг иж бүрэн тохижуулах
ажлыг 2016 оноос эхлэн хэрэгжүүлж ирсэн. Энэ дагуу 2016 онд Улсын гуравдугаар төв эмнэлэг, 2017 онд ГССҮТ, Сонгинохайрхан дүүргийн Эрүүл
мэндийн нэгдэл, ХСҮТ, 2018 онд нийслэлийн Өргөө амаржих газар, Амгалан амаржих
газар, Баянзүрх дүүргийн нэгдсэн эмнэлэг, Хан-Уул дүүргийн 1 дүгээр амбулатори,
ЭХЭМҮТ-ийн гадна зам, талбайг иж бүрэн
тохижуулан ашиглалтад хүлээлгэж өгөөд байна.
Улсын хэмжээний лавлагаа шатлалын эмнэлгүүдэд сүүлийн 40
жилийн хугацаанд гадна зам, талбайн тохижилтын ажил огт хийгдээгүй бөгөөд иргэд
төдийгүй эмнэлгийн ажилтнуудын хувьд авто зогсоолоос эхлээд тулгамдсан асуудал
цөөнгүй байсан. Тэгвэл эмнэлгийн байгууллагуудын гадна зам, талбайг иж бүрэн
тохижуулах ажлын хүрээнд ХӨСҮТ-ийн 11.728 м2 талбайд асфальтан
хучилт хийж, 194 машины авто зогсоол байгуулж, 2585 м2 талбайг явган хүний зам
болгон засчээ. Мөн ногоон байгууламж бүхий амралтын орчинд 13 ширхэг зөөврийн
мод суулгаж, гэрэлтүүлэг 31, сандал 10, хогийн сав 15 ширхэгийг байрлуулсан аж.
Нийт 1.6 тэрбум төгрөгийн өртөг бүхий тус ажлын хүрээнд олон улсын жишигт нийцсэн, яаралтай түргэн тусламжийн үед ашиглах нисдэг тэрэгний зогсоолыг байгуулжээ.
Өмнө нь ГССҮТ, ЭХЭМҮТ-ийн гадна зам, талбайг тохижуулах ажлын
хүрээнд нисдэг тэрэгний зогсоолыг байгуулан хүлээлгэж өгч байсан билээ.
Ийнхүү эмнэлгийн байгууллагын гадна зам, талбайд
гэрэлтүүлэг, явган хүний зам, ойн төгөл бүхий ногоон байгууламж, амралтын
сүүдрэвч болон авто зогсоолыг бий болгож, замын хөдөлгөөний зохион байгуулалтыг
шийдвэрлэн, орц гарцыг нэмэгдүүлснээр иргэд түгжрэлгүй, аюулгүй, ая тухтай
орчинд эрүүл мэндийн тусламж, үйлчилгээ авах нөхцлийг бүрдүүлж байгаа аж.
Тус арга хэмжээнд Нийслэлийн Засаг дарга бөгөөд Улаанбаатар
хотын Захирагч С.Батболд, Улаанбаатар хотын Ерөнхий менежер бөгөөд
Захирагчийн ажлын албаны дарга Т.Гантөмөр, Нийслэлийн Эрүүл мэндийн газрын
дарга Л.Төмөрбаатар, ХӨСҮТ-ийн ерөнхий захирал Д.Нямхүү болон албаны бусад
хүмүүс оролцсон юм.
