Улаанбаатар
Орон нутгийн үйлдвэрийн бараа, бүтээгдэхүүнийг төрийн худалдан авалтаар дэмжих санал тавив
ОРОН НУТГИЙН МЭДЭЭ | ХОВД
Ховд/МОНЦАМЭ/ Ховд аймгийн Засаг даргын орлогч Т.Жаргалсайхан жижиг дунд үйлдвэрийн үйл ажиллагаатай танилцав.
Орон нутгийн хөгжил, өнөөгийн эдийн засгийн байдлыг дэмжих гол
үзүүлэлтийн нэг нь аж үйлдвэрийн салбарын хөгжил юм. Тиймээс орон нутагт
үйлдвэрлэсэн бараа бүтээгдэхүүнийг дотоодын зах зээлд нийлүүлэх, экспортыг
нэмэгдүүлэх замаар үйлдвэрлэгчдийг дэмжин хөгжүүлэх, өрхийн үйлдвэрлэл
эрхлэгчид, жижиг дунд үйлдвэрлэгчдийг дэмжих зорилгоор “Үйлдвэрлэгч Ховд”
хөтөлбөр боловсруулан хэрэгжүүлэхээр төлөвлөж байна.
Тус хөтөлбөрийг
боловсруулах ажлын хүрээнд аймгийн Засаг даргын орлогч Т.Жаргалсайхан, аймгийн
ХХААГ-ын Жижиг дунд үйлдвэрлэл, хоршоо хариуцсан мэргэжилтэн Д.Эрдэнэдорж нар
Жаргалант суманд идэвхтэй үйл ажиллагаа явуулж байгаа зарим жижиг, дунд
үйлдвэрийн үйл ажиллагаатай газар дээр нь танилцав. Тэд үйлдвэрлэлийг өргөжүүлэх, хөгжүүлэх нөөц
боломж, цаашдын чиг хандлага, бүтээгдэхүүний тоо хэмжээ, нэр төрлийн өсөлт,
борлуулалт, нийлүүлэлт, тулгамдаж буй асуудлуудын талаар саналыг нь сонсож, ярилцлаа.
Жаргалант суманд 200
гаруй жижиг, дунд үйлдвэр, аж ахуйн нэгж идэвхтэй үйл ажиллагаа явуулж байгаа юм. Тэдгээрийн
төлөөлөл “Жаргалант шанд” ХХК–ийн махны, “Зөөлөн тэмүүлэл” ХХК-ийн хөөсөнцөр, сендвич хавтан, хар цагаан замаск, C-төмрийн, “Цасны хаан
нөхөрлөл”-ийн гутлын, Баянзаан ХХК-ийн Барилгын нүхтэй блокны, “Алтайн Сүрлэг пирамид” ХХК-ийн ноос ноолуур угаах, ноосон
бүтээгдэхүүн боловсруулах, “Эко гутал” ХХК-ийн гутлын, “Нарсны үнэр” ХХК-ийн гэрийн тавилга үйлдвэрлэлийн үйл ажиллагаатай
танилцлаа.
Эдгээр үйлдвэрлэл эрхлэгчидтэй санал солилцох үеэр жижиг дунд үйлдвэр эрхлэгч, аж ахуйн нэгжүүд
нь орон нутгийн үйлдвэрийн бараа, бүтээгдэхүүнийг нийтэд сурталчлах, төрийн
худалдан авалтаар дэмжих, борлуулалтын сүлжээг өргөтгөх, “Ховдод үйлдвэрлэв”
нэрийн бүтээгдэхүүнийг бий болгох зэрэг санал тавьсан юм.
Мөн үйлдвэрлэлийн тоног төхөөрөмж, хүчин чадлыг
нэмэгдүүлэх, Жижиг, дунд үйлдвэрийг хөгжүүлэх сан, Олон Улсын төсөл
хөтөлбөрүүдээс санхүүгийн дэмжлэг авах, гадаад, дотоодын үйлдвэр эрхлэгчидтэй
туршлага солилцох зэрэг саналуудыг уламжлав.
Эдгээр саналуудыг
“Үйлдвэрлэгч Ховд” хөтөлбөрт тусгаж, идэвхтэй үйл ажиллагаа явуулж буй өрхийн
болон жижиг, дунд үйлдвэрлэл эрхлэгчид, аж ахуйн нэгжийн үйл ажиллагааг
өргөжүүлэн хөгжүүлэхэд анхаарч, дэмжиж ажиллана гэж аймгийн Засаг даргын орлогч
Т.Жаргалсайхан хэллээ.
