Ulaanbaatar
УВС: Улсын чанартай олимпиадад байр эзэлсэн багш, сурагчдыг 87 сая төгрөгөөр шагнаж урамшууллаа
ОРОН НУТГИЙН МЭДЭЭ | УВС
Улаангом, 2025 оны тавдугаар сарын 7 /МОНЦАМЭ/. Улсын төрөлжсөн болон улсын чанартай олимпиад, уралдаанд амжилттай оролцон аймаг, орон нутгийнхаа нэрийг өндөрт гаргасан багш, сурагчдыг урамшуулж, алдаршуулах “Амжилт бахархал-2025” ёслол хүндэтгэлийн үйл ажиллагаа боллоо.
Увс аймгийн боловсролын салбарынхан 2024-2025 оны
хичээлийн жилд улсын төрөлжсөн олимпиадын “Багш” төрөлд 1 алт, 1 мөнгө, 3
хүрэл, “Сурагч” төрөлд 3 алт, 3 мөнгө, 2 хүрэл медаль хүртжээ. Мөн монгол хэл,
бичгийн “Анги нийт”-ийн төрөлд 4 мөнгө, 1 хүрэл медаль хүртсэнээс гадна “Улсын
шилдэг илтгэл” шалгаруулах эрдэм шинжилгээний хуралд нэг багш дэд байр эзэлсэн байна. Энэхүү амжилтыг гаргасан сурагчийг 3-5 сая, багшийг 1-3 сая,
бэлтгэсэн багшийг 800 мянгаас 2 сая хүртэл төгрөгөөр шагнаж урамшууллаа.
Мөн улсын төрөлжсөн олимпиадаас бусад олимпиад, уралдааны
амжилтыг журмын дагуу үнэлсэн бөгөөд мэргэжлийн болон техникийн боловсролын
сургалтын байгууллагын улсын төрөлжсөн олимпиадаас 3 алт, 2 мөнгө, 1 хүрэл
медаль, Бага ангийн багш нарын улсын 2-р уралдаанаас 2 алт, 1 мөнгөн медаль, олон улсын Логик паззлын уралдааны 2-р шатнаас 2 мөнгө, 5 хүрэл цом, “Оюуны
наадам- 2025” улсын уралдаанаас 5 алт, 1 мөнгө, 3 хүрэл, ТОП-10 медаль 9
тамирчин сурагч хүртсэн зэрэг бахархам амжилтуудыг Увс аймгийн багш, сурагчид гаргасан
байна.
Тус үйл ажиллагааг Увс аймгийн ЗДТГ-аас зохион байгуулж, 87
сая төгрөгөөр багш, сурагчдыг урамшууллаа.
