Ulaanbaatar
СЭЛЭНГЭ: Мэдрэлийн эрчимт эмчилгээний тасаг тоног төхөөрөмжөө нэмлээ
ОРОН НУТГИЙН МЭДЭЭ | СЭЛЭНГЭ
Сүхбаатар,
2024 оны арванхоёрдугаар сарын 26 /МОНЦАМЭ/. Сүүлийн
жилүүдэд тархины цочмог цус харвалтын улмаас хэвтэн эмчлүүлэгчдийн тоо нэмэгджээ. Үүнтэй холбогдуулан аймгийн Нэгдсэн эмнэлгийн Мэдрэлийн тасагт
Харвалтын эрчимт эмчилгээний өрөөг тохижуулах, тусламж үйлчилгээг түргэн
шуурхай үзүүлэхэд нэн шаардлагатай тоног төхөөрөмжийн дэмжлэгийг үзүүллээ.
Сэлэнгэ аймгийн Засаг даргын зүгээс 2024 онд Нэгдсэн эмнэлэгт орон нутгийн хөрөнгө оруулалтаар тусламж үйлчилгээ, эмч эмнэлгийн мэргэжилтний сургалт, ажлын байрны орчин сайжруулах, тоног төхөөрөмжийн шинэчлэл хийх зэрэгт нийт 1.5 тэрбум төгрөгийг шийдвэрлэсэн байна.
Цаашид 2025
онд Мэс заслын вакуум хагалгааны өрөөг тохижуулахад зориулж 1.2 тэрбум төгрөгийг аймгийн хөрөнгө
оруулалтаар хийж гүйцэтгэхээр төлөвлөжээ.
Энэ удаад
эрчимт эмчилгээний пункцианаль ор, 24 цагийн хяналттай монитор, өвчтөн
тээвэрлэхэд зориулсан хүчил төрөгчийн баллон, орчин үеийн зөөврийн дамнуурга өглөө. Ингэснээр 1 ортой байсан эрчимт эмчилгээний өрөө 2 ортой боллоо.
Аймгийн
Нэгдсэн эмнэлгийн мэдрэлийн эмч Т.Бүрэнжаргал, “Сэлэнгэ аймгийн Нэгдсэн эмнэлгийн мэдрэлийн тасгаар
жилд 500 орчим хүн үйлчлүүлдэг. 2024 оны байдлаар 466 хүнд мэдрэлийн тусламж
үйлчилгээг бид үзүүлээд байна. Үүн дотор хурц харвалт буюу цус хомсрох, цус
харвасан 91 хүнд тусламж үйлчилгээ үзүүллээ. Манай эрчимт эмчилгээний тасаг
нэн шаардлагатай тоног төхөөрөмж хүрэлцээгүйн улмаас бусад тасгаасаа
дамжуулж хэрэглэдэг.
Одоо бид
эрчим эмчилгээний тасгаа өргөжүүлж, шаардлагатай тоног төхөөрөмжтэй боллоо.
Энэ маань бидний зүгээс үзүүлэх тусламж үйлчилгээний хүртээмж, чанарыг нэмэгдүүлэх, өвчтөнд ая тух, таатай орчныг үүсгэх боломжийг олголоо” хэмээн ярилаа.
