Ulaanbaatar
ДУНДГОВЬ: 2024 онд аялал жуулчлалын дөрвөн эвент зохион байгуулна
ОРОН НУТГИЙН МЭДЭЭ | ДУНДГОВЬ
Мандалговь, 2024 оны нэгдүгээр сарын 17 /МОНЦАМЭ/. 2024 онд Дундговь аймагт аялал жуулчлалын дөрвөн эвент
үйл ажиллагааг уламжлал ёсоор зохион байгуулна.
Тодруулбал, 2 дугаар
сарын 23-нд Өлзийт суманд “Тэмээний өв соёл”, 6 дугаар сарын 24-25-нд Өлзийт
сумын Цагаан суварга байгалийн үзэсгэлэнт газарт “Сэтгэшгүй оддын чуулган”, 7 дугаар сарын 27-28-нд Говь-Угтаал
суманд “Морьтой монгол” аялал, 9 дүгээр сарын 13-14-нд Адаацаг сумын Сүм хөх
бүрдэд “Адуучны өв соёлын баяр”-ыг аймгийн ЗДТГ, БОАЖГ-аас холбогдох
байгууллагуудтай хамтран зохион байгуулах юм.
Тус аймгийн хувьд аялал жуулчлалыг хөгжүүлэх, гадаад,
дотоодын жуулчдын тоог нэмэгдүүлэх зорилгоор аялал жуулчлалын брэнд бий болгож,
“Сэтгэшгүй оддын чуулган” эвентийг 2022 оноос, “Уяхан замбуу тивийн наран”
урлагийн их наадмыг 2019, 2023 онд, “Адуучны өв соёл” үйл ажиллагааг жил бүр
зохион байгуулж байна.
“Сэтгэшгүй оддын чуулган” үйл ажиллагааны онцлог нь од
ажиглахад нэн таатай бүс болох Монголын говийн хязгааргүй хээр нутагт одон
орныг ажиж танин мэдэх, Цагаан суварга, Дэл уул зэрэг байгалийн үзэсгэлэнт,
түүх соёлын дурсгалт газраар аялан, түүх соёлтой танилцах боломжийг олгон аялагчдад
оюун санаа, амралтын сайхан мэдрэмж төрүүлэхэд чиглэгддэг.
Харин “Морьтой монгол” аялал, “Адуучны өв соёлын баяр”, “Тэмээний өв соёл” эвент үйл ажиллагаа нь нүүдэлчин түмний адуу, тэмээний өв соёлыг сурталчлан таниулдаг онцлогтой. Тухайлбал, “Адуучны өв соёлын баяр”-ын үйл ажиллагааны хүрээнд унага уях, гүү саах, унага уралдуулах зэрэг зан заншлыг харуулж, “Сайхан хос морьтон”, “Сайхан хөхүүр”, “Сайхан айраг”, “Сайхан хөхүүр хийдэг өвлөн уламжлагч”-ийг шалгаруулах бөгөөд адуучин залуусын адуу маллах ёс заншлыг харуулсан “Адуучин тэмцээн”-ийг зохион байгуулдаг.
Мөн энэ үеэр адууны эдлэл хэрэгслийн худалдааг зохион байгуулж, айраг уух, дэмбээ наадаан, хуруу барих зэрэг тэмцээн, уралдаан болдог онцлогтой юм.
