Улаанбаатар
НҮБ-ын Палестины дүрвэгчдэд туслах агентлагийн санд тусламж өгөхийг Арабын орнуудад уриалжээ
ДЭЛХИЙН МЭДЭЭ | УЛС ТӨР
БЕЙРУТ. /Синьхуа/. НҮБ-ын дэргэдэх Палестины дүрвэгчдэд туслах агентлагийн /UNRWA/ санд АНУ санхүүгийн тусламж олгохоо зогсоохоор шийдвэрлэсний дараа уг санд тусламж үзүүлэхийг Ливан дахь ХАМАС хөдөлгөөний төлөөлөгч Али Барака Арабын орнуудад хандан мягмар гарагт уриалжээ. Энэ тухай Ливаны “Элнашра” сонинд бичсэн байна.
“Европын орнуудтай харьцуулахад Арабын баян орнууд энэхүү санд бага хэмжээний тусламж үзүүлдэг” гэж А.Барака онцлон тэмдэглэсэн байна. Мөн тэрбээр АНУ-ын шийдвэрийг "улстөржсөн" гэж шүүмжилжээ.
“НҮБ-ын Палестиний дүрвэгчдэд туслах агентлагийн санд хандив өгөхөө зогсоолоо” гэж АНУ өнгөрсөн долоо хоногийн баасан гарагт зарласан байна. Энэ мэдэгдэл Ливанд палестинчуудын байх хугацааг сунгахыг дэмжиж байсан Ливаны өндөр албан тушаалтнуудын дургүйцлийг ихээхэн хүргэсэн ажээ.
Ливаны Гадаад хэргийн сайд Гебран Бассил даваа гарагт уг асуудлаар 24 орны дипломат төлөөлөгчидтэй уулзалт хийсэн бөгөөд Франц, Швейцарь, Их Британи зэрэг улс НҮБ-ын Палестины дүрвэгчдэд туслах агентлагийн санд олгодог тусламжаа нэмэгдүүлнэ гэдгээ мэдэгдсэн байна.
Э.Хулан
