МИЛАН./BBC/.Италийн хөлбөмбөгийн “Пескар” багийн хагас хамгаалагч, Гана гаралтай Салли Мунтари-тай холбоотой дуулиан Италийн хөлбөмбөгийн нэр хүндийг унагаж байна гэж Италийн Хөлбөмбөгийн холбооны арьсны өнгөөр ялгаварлан гадуурхахтай тэмцэх асуудал эрхэлсэн зөвлөх мэдэгджээ.

Хөгжөөн дэмжигчдэд ямар нэгэн арга хэмжээ аваагүй атлаа арьсны өнгөөр ялгаварлангадуурхах явдлыг эсэргүүцсэн хөлбөмбөгчинд шийтгэл ногдуулсан нь муу үлгэр дууриаллыг өөгшүүлж байна гэж зөвлөх Фиона Мэй хэлсэн байна. Тэрбээр ярихдаа “хэрэв би өөрөө тоглогч байсан бол үүнийг эсэргүүцэж ажил хаях байсан. Би бухимдаж бас цочирдож байна" гэжээ.

BBC агентлагийн хөлбөмбөгийн тайлбарлагч, арьсны өнгөөр ялгаварлан гадуурхахын эсрэг “Өшиглөж зайлуул” гэдэг байгууллагын тэргүүн Гаарт Крүүкс хэлэхдээ "Мунтариг шийтгэсэн атлаа буруутай хөгжөөн дэмжигчдийг шийтгэхгүй байгааг эсэргүүцэж ажил хаях"-ыг Италийн хөлбөмбөгчдөд уриалсан байна.

“Кальяри” багийн зарим хөгжөөн дэмжигчдийн зүгээс өөрийг нь хэл амаар доромжилсон гэж гомдол гаргасан Мунтарийг тэмцээний шүүгч шар хуудсаар торгосон билээ. Үүнийг эсэргүүцсэн Мунтари талбайг орхин явсан юм.

Италийн хөлбөмбөгийн Serie A-гийн Сахилга батын хороо Мунтариг шийтгэсэн явдлыг зөвтгөсөн боловч арьсны өнгөөр ялгаварлан гадуурхсан үг хэлж, орилолдож байсан хүмүүсийн тоо 10 хүрэхгүй байсан тул тэдэнд шийтгэл ногдуулах үндэслэл алга гэж үзжээ.

Х.Сарнай