Хакасаас Монгол руу цахилгаан дамжуулах шугам барихыг "Россети" компани санал болголоо

Дэлхийд | Дэлхийд бидний тухай
bars@montsame.mn
2017-04-20 11:41:52
 
МОСКВА. /Neftegaz.ru/. Эрчим хүчний “Россети” компани Сэлэнгэ мөрөн дээр УЦС барихгүйгээр Оросоос цахилгаан дамжуулах шугам татах хувилбарыг Монголын талд санал болгож байна. Энэ тухай 2017 оны 4 дүгээр сарын 18-нд “Россети”-ийн  захирал О.Бударгин Евразийн орон зайд эрчим хүчний системийг интеграцчилах асуудлаар болсон “Дэлхийн эрчим хүчний салбарын хөгжил, Торгоны замын эдийн засгийн бүсийг байгуулах нь” сэдэвт олон улсын бага хурлын үеэр мэдээлжээ.

ВЛ-500 маршрут нь Хакас улсаас эхэлж Тувагийн нутгаар дайран Монгол руу нэвтэрч, улмаар Буриадаар дамжин Оросын нутаг дэвсгэрт дахин орж ирэх юм. Энэ чиглэл нь  Монголд тус тусдаа байдаг эрчим хүчний 1 ГВт-ын хүчин чадалтай 5 шугамыг хооронд нь нэгтгэх юм.
 
Оросын хувьд уг шугам нь Сибирь болон Алс Дорнодын бүс нутгийн хоорондын холбоог бэхжүүлэх ажээ.
Монголын эдийн засаг одоо эрчимтэй хөгжиж байгаа боловч тус улс эрчим хүчний дутагдалд ороод байгаа юм

Монголын талын үзэж байгаагаар, 1 ГВт-ын нэмэлт эрчим хүч Монголын ирээдүйн хөгжилд шаардлагатай байгаа, харин Орос улс ийм хэмжээний эрчим хүч өгөхөд бэлэн байна. Үүнээс гадна Оросын тал цахилгаан эрчим хүчний хөнгөлөлттэй үнийг Монголд санал болгож байгаа юм.

Харин Монголын талын барихаар төлөвлөж буй Сэлэнгэ болон түүний цутгал голууд дээрх УЦС-уудыг барих хэрэггүй гэж О.Бударгин үзэж байна. Монгол улс гурван УЦС барих гэж байгаа юм. Сэлэнгэ мөрөн дээр 350 МВт-ын хүчин чадалтай Шүрэнгийн УЦС, түүний цутгал болох Эгийн гол дээр 220 МВт-ын хүчин чадалтай УЦС, Орхон дээр 100МВт-ын хүчин чадалтай УЦС барих ажээ. Сэлэнгэ мөрөн нь Байгал нуурт цутгадаг ба УЦС барих нь экологичдийн зүгээс шүүмжлэл дагуулж байгаа билээ.

Эрдэмтдийн үзэж байгаагаар, УЦС барих нь Байгал нуур, Сэлэнгэ мөрний хосгүй экосистемд сөргөөр нөлөөлөх талтай, нэн ялангуяа Байгал нуурын сав газарт ус багадаж байгаа энэ үед бүр ч муугаар нөлөөлнө. Өөр нэгэн сөрөг тал нь Ангарын УЦС-ын үйл ажиллагааг тогтворгүй болж магадгүй гэдэгт байгаа юм.

Үүнтэй холбоотойгоор 2014 онд тус төслийн хэрэгжилтийг түр зогсоосон гэсэн хэдий ч Монголын тал төслийг  сэргээн хэрэгжүүлэх оролдлого хийх болжээ. 2016 оны 9 дүгээр сарын сүүлчээр Монгол Улс Сэлэнгэ мөрний сав газарт УЦС барих баримт бичгүүдийг боловсруулах ажлыг тендерийг  зарласан юм. Оросын тал үүнийг эрс эсэргүүцсэн ба 2016 оны 12 дугаар сард Орос болон Монгол улс энэ асуудлыг зохицуулах ажлын хэсгийг байгуулсан билээ. /2017.04.18/.

http://neftegaz.ru/forum/showthread.php?tid=51158
О.Барс 




 
Холбоотой мэдээ