Улаанбаатар
Тусгай олимпод амжилттай оролцжээ
ОРОН НУТГИЙН МЭДЭЭ | БАЯНХОНГОР
Баруун бүсийн тусгай олимпод Баянхонгорын баг тамирчид амжилттай оролцлоо.
Говь-Алтай аймагт улирагч сарын 29-нөөс хоёрдугаар сарын 1-ний өдрүүдэд болсон Баруун бүсийн тусгай олимпод Завхан, Увс, Ховд, Баян-Өлгий, Говь-Алтай, Баянхонгор, Өвөрхангай аймгийн Оюуны бэрхшээлтэй 100 гаруй хүүхдүүд оролцсон байна. Тэд сагсан бөмбөг, ширээний теннис, байрнаас уртад үсрэх, 50, 100 метрийн гүйлт, туузтай гимнастик зэрэг таван төрлөөр хурд хүч, авхаалж самбаагаа сорин өрсөлджээ.
Тусгай олимпт оролцсон Баянхонгор аймгийн хүүхдүүд хоёр алт, нэг мөнгө, гурван хүрэл медаль хүртсэн амжилт үзүүлсэн. Тамирчин Б.Содномцог байрнаас уртын харайлт, 100 метрийн гүйлтэд оролцож төрөл тус бүрээс алтан медаль, С.Мөнх-Учрал ширээний теннисээс мөнгөн медаль, Ү.Эрдэнэтунгалаг ширээний теннис, Б.Мөнхбат 100 метрийн гүйлт, Б.Эрдэнэтуяа 50 метрийн гүйлтэд оролцож тус бүр хүрэл медаль хүртлээ.
Сонирхуулахад, Баруун бүсийн тусгай олимпт оролцсон тамирчдад аймгийн Засаг даргын нөөцөөс 700.0 мянган төгрөгийг дэмжлэг үзүүлжээ.
Б.Мөнхзул
