ДЭМБ-ын Суурин төлөөлөгч Оюутны эрүүл мэндийн төвд ажиллав
МОНГОЛЫН МЭДЭЭ | ЭРҮҮЛ МЭНД“Эрүүл ирээдүйн төлөө хамтдаа” аяны хүрээнд ДЭМБ-ын суурин төлөөлөгч Др Су Нюунт У Оюутны эрүүл мэндийн төвд ажиллалаа.
Тэрбээр Нийгмийн Эрүүл мэндийн хүрээлэн /НЭМХ/, ДЭМБ-ын дэмжлэгтэй өнгөрсөн сарын 21-нээс эхлэн зохион байгуулсан тус аяны сургалт, сурталчилгааны нэг хэсэг болох ШУТИС-ийн гуравдугаар дотуур байр болон 1000 оюутны дотуур байранд байрлах Оюутны эрүүл мэндийн төвд ажиллан, үйл ажиллагаатай нь танилцсан юм.
Энэхүү аяны хүрээнд “БЗДХ-аас хэрхэн сэргийлэх”, Эрүүл мэнд, БСШУС, ХНХ-ын гурван сайдын хамтарсан “Хөдөө орон нутгаас суралцаж буй оюутан, залуус эрүүл мэндийн тусламж, үйлчилгээг хэрхэн авах”, Эрүүл мэндийн даатгалд хамрах талаар сургалт, сурталчилгааны материал болон мэдээллийг хүргэснээрээ онцлогтой.
Мөн ДЭМБ-ын дэмжлэгтэй байгуулсан Оюутны эрүүл мэндийн төвийн үйл ажиллагаа, бодит байдал, тулгамдаж буй асуудалтай танилцан, цаашид шийдвэрлэх талаар ярилцаж, зөвлөгөө өгснөөр өндөрлөв.
Ж.Болор