Улаанбаатар
Хил дамнасан төмөр замын төсөлтэй танилцлаа
МОНГОЛЫН МЭДЭЭ | ЭДИЙН ЗАСАГ
Улаанбаатар, 2023 оны арваннэгдүгээр сарын 15 /МОНЦАМЭ/. Гашуунсухайт-Ганцмод боомтын хил дамнасан төмөр замын гүүрэн байгууламжийг хамтран барих, хилийн түр гарц нээх, журам тогтоох талаар Монгол Улс, БНХАУ-ын Засгийн газар хоорондын хэлэлцээрийн төслийг хэлэлцэн тохиролцох хоёр талын хамтарсан ажлын хэсэг байгуулагдан ажиллаж байна.
Тус ажлын хэсгийн БНХАУ-ын
Төмөр замын газар, “Чайна энержи групп”, “Чайна энержи Баошөн төмөр зам”
ХХК-ийн төлөөлөл Гашуунсухайт-Ганцмод боомтын үйл ажиллагаатай танилцлаа.
Гашуунсухайт-Ганцмод хилийн боомтыг холбох төмөр зам ашиглалтад орсноор Тавантолгой-Гашуунсухайт чиглэлийн төмөр замаар жилд 30-50 сая тонн хүртэлх нүүрс экспортод гаргах боломжтой болох аж.
Монгол Улсын талаас ЗТХЯ-ны Төмөр зам, далайн тээврийн бодлого зохицуулалтын газрын дарга Х.Итгэлт, “Тавантолгой төмөр зам” ХХК-ийн гүйцэтгэх захирал Н.Будбаяр, БНХАУ-ын талаас Улсын төмөр замын газрын төлөвлөлт, стандартын судалгааны хүрээлэнгийн дэд захирал Дан Ли, “Чайна энержи Баошөн төмөр зам” ХХК-ийн хил дамнасан төмөр замын төсөл хариуцсан захирал Ван Шань Жүн нар болон ажлын хэсгийн бусад гишүүд Гашуунсухайт-Ганцмод боомт, Тавантолгой-Гашуунсухайтын чиглэлийн төмөр зам, Гашуунсухайт өртөө, шилжүүлэн ачих терминалын төсөлтэй газар дээр нь танилцаж, ажиллалаа.
Гашуунсухайт-Ганцмод боомтын хил дамнасан төмөр замын ТЭЗҮ болон зураг төслийг энэ онд багтаан дуусгахаар төлөвлөж байгаа бол бүтээн байгуулалтын ажлыг 2024 оны эхний улиралд эхлүүлэхээр бэлтгэл ажлын ханган ажиллаж байна.
