Т.Тулга, С.Жамбалжамц нарт хүндэтгэл үзүүллээ
МОНГОЛЫН МЭДЭЭ | СПОРТУлаанбаатар, 2023 оны арваннэгдүгээр сарын 1 /МОНЦАМЭ/. МҮОХ-ны Ерөнхийлөгч, ОУОХ-ны гишүүн Б.Баттүшиг “Ханжөү 2022” Азийн наадмын чөлөөт бөхийн 57 кг-ын жингийн аварга Т.Тулга болон дугуйн засмал замын бөөн гараатай уралдаанаас хүрэл медалийг эх орондоо авчирсан С.Жамбалжамц нарыг өчигдөр Олимпик хауст хүлээн авч, хүндэтгэл үзүүллээ.
Уулзалтаар
МҮОХ-ны Ерөнхийлөгч Б.Баттүшиг тамирчид нь нийгэм даяар үлгэр дуурайлал үзүүлж,
эерэг зүйлсийг түгээн дэлгэрүүлэх, Олимпын хөдөлгөөний гол цөм хэмээн онцолж,
МҮОХ-ноос тамирчдаа уриалан нийгмийн сайн сайхны төлөөх үйл ажиллагааг эрчимтэй
өрнүүлэхээр ярилцсан байна.
Түүнчлэн
МҮОХ-ны Тамирчдын комиссын үйл ажиллагаанд идэвхтэй оролцон тамирчдад тулгамдаж
буй асуудлуудыг дэвшүүлэхэд дуу хоолойгоо нэгтгэхийг уриалж, "Парис
2024" Олимпын наадамд өндөр амжилт гаргахыг хүсэн ерөөжээ.