Хөвсгөл нууранд живсэн машин, техникийг татан гаргах ажилд Япон улс дэмжин ажиллана

МОНГОЛЫН МЭДЭЭ | БАЙГАЛЬ ОРЧИН
boloroo8136@gmail.com
2022-05-19 11:09:32

Улаанбаатар /МОНЦАМЭ/. Байгаль орчин, аялал жуулчлалын сайд Б.Бат-Эрдэнэ Япон улсын байгаль орчны сайд Ц.Ямагүчи, дэд сайд Т.Оока нартай уулзлаа.


Уулзалтаар байгаль хамгаалал, уур амьсгалын өөрчлөлт, цөлжилт, шар шороон шуурга, усны менежмент, нүүрс төрөгчийн хий шингээлт, биологийн олон янз байдал, агаар орчны бохирдол, заг хамгаалал, Хөвсгөл нууранд живсэн машин, техникийг татан гаргах ажиллагаа зэрэг өргөн сэдвээр санал солилцож, байгаль орчны салбарт хамтран ажиллах санамж бичигт гарын үсэг зурав.

Монгол, Япон улс дипломат харилцаа тогтоосны 50 жилийн ой тохиож буй энэ цаг хугацаанд тус улсад айлчлал хийж, биечлэн уулзаж байгаад Япон Улсын Байгаль орчны сайд Ц.Ямагүчи, дэд сайд Т.Оока нар БОАЖ-ын сайд Б.Бат-Эрдэнэд талархаад, цаашид хоёр орны хоорондын нөхөрсөг харилцаа, хамтын ажиллагааг улам бэхжүүлэхийг эрмэлзэж буйгаа илэрхийлэв.

Талууд байгаль орчныг хамгаалах асуудалд дэлхийн болон бүс нутгийн хамтын ажиллагааны хүрээнд олон талт, үр дүнтэй ажлуудыг хамтран хийж хэрэгжүүлэхээр ярилцлаа. Тухайлбал, хоёр орны хамтын ажиллагааны хүрээнд Монгол Улсын Ерөнхийлөгч У.Хүрэлсүхийн санаачилга Хөвсгөл нуурыг хамгаалах чиглэлээр тус нууранд живсэн 28 машин, техник, онгоцыг татан гаргах ажиллагааг Япон Улс бүрэн дэмжин ажиллахаа илэрхийлэв.

Ташрамд дурдахад, Хөвсгөл нуур нь манай улсын нийт цэнгэг усны 74.6 хувийг эзэлдэг стратегийн чухал ач холбогдолтой нуур юм. Нууранд живсэн 28 машин, техникийн тав нь дотроо шатахуунтай учир эн тэргүүнд татан гаргах зайлшгүй шаардлага тулгараад байгаа. Живсэн машин, техникийг татан гаргах ажиллагааны хүрээнд өнгөрсөн жил Монгол Улсын Ерөнхийлөгч У.Хүрэлсүхийн санаачилгаар 1985 онд живсэн хөлгийг амжилттай татан гаргаж чадсан. Тус ажиллагааны хүрээнд Хөвсгөл нууранд живсэн 28 машин, техникийг 2024 онд бүрэн татан гаргахаар төлөвлөгөөт ажлыг шат дараатай хийж байна.

 

Холбоотой мэдээ