Улаанбаатар
Д.Эрдэнэбилэг Гран при тэмцээний хошой аварга боллоо
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Зуун буудалт даамын Хаврын Гран при тэмцээнд Монгол Улсын гавьяат тамирчин, Олон улсын их мастер Д.Эрдэнэбилэг боломжит 18 онооноос 16-г авсан амжилтаар тэргүүллээ.
Ийнхүү
ОУИМ Д.Эрдэнэбилэг швейцарь системээр 9 өрөг тоглож дүнгээ гаргадаг тус
тэмцээнд хоёр дахь удаагаа /2019, 2022/ түрүүлж байна. Тэмцээний 2-5 дугаар
байрт ДДХМ Ц.Хашчулуун 14, СМ Б.Ганзориг 14, СМ Б.Батжаргал 13, СМ
Б.Пүрэвбаатар 13 оноогоор тус тус шалгарсан.
Монголын даамын холбоо /МДХ/ бүтэц бүрэлдэхүүндээ өөрчлөлт хийж, шинээр Удирдах зөвлөлөө сонгосноос хойш 2022 оны анхны том тэмцээн болох Хаврын Гран при-г Төмөр замын дээд сургуулийн байранд МДХ, Нийслэлийн даамын холбоо, УБТЗ-ын Татах хэсгийн “Дөл” клуб, “Чина Галсан сан”-гаас хамтран зохион байгуулж 110 тамирчин өрсөлдөж ийнхүү шилдгүүдээ шалгаруулж байна.
Монгол Улсын аварга шалгаруулах хагас шигшээ тэмцээний
өмнөх том сорилго болсон энэ тэмцээнд хөдөө орон нутгаас Архангай, Баянхонгор,
Баян-Өлгий, Булган, Дорноговь, Дундговь, Өмнөговь, Дархан-Уул, Төв аймгийн
тамирчид ирж оролцсон юм.
Тэмцээний
эмэгтэй ангилалд ДДХДМ Б.Есүй, ОУИМ Б.Мишээл, ОУИМ М.Нямжаргал эхний 3 байрыг
эзэлсэн бол ахмадын ангилалд ДДХМ Д.Ганболд, охидын ангилалд ДМ Ц.Цацрал,
хөвгүүдийн ангилалд ДМ Н.Түвшинбаяр нар аваргалжээ. Тусгай шагналыг Б.Дамбажав /Төв
аймаг/, Ч.Дашпунцаг /Баянхонгор/, Э.Баттүшиг /Дундговь/, А.Амин-Эрдэнэ /Алтан
хүү клуб/ нарт олгосон юм.
Энэ
тэмцээнээс Ц.Цацрал /Алтан хүү клуб/ спортын мастер, О.Отгонбаяр /Зүтгүүрийн
депо/, Э.Номунзаяа /Хөлөгт тоглоом клуб/, Б.Дамбажав /Төв аймаг/, Б.Батпүрэв /Зүтгүүрийн
депо/ дэд мастер цолны болзлыг биелүүлсэн байна.
