Улаанбаатар
Энэ сарын 11-нд “Эрдэнэт хотын өдөр”- ийг тэмдэглэнэ
ОРОН НУТГИЙН МЭДЭЭ | ОРХОН
Орхон/МОНЦАМЭ/. Энэ сарын 11-нд “Эрдэнэт хотын өдөр” тохионо. Үүнийг угтаж хүчит бөхийн барилдаан, Сархиа цанын бааз, аймгийн Музей иргэдэд үнэ төлбөргүй үйлчилж, бүтээн байгуулалтын нээлтүүд болно. Мөн ирэх баасан гаригт аймгийн ИТХ-ын төлөөлөгчид болон орон нутгийн удирдлагууд ерөнхий боловсролын сургуулийн ахлах ангийн сурагчдад “Эрдэнэт хотын түүх” сэдвээр хичээл заана.
Энэ жил Орхон аймагт соёлын төв, багийн нэгдсэн байр, өрхийн эрүүл мэндийн
төв, цэцэрлэг гээд 10 гаруй барилга байгууламж ашиглалтад орсон. Тэгвэл
“Эрдэнэт хотын өдөр”-ийг тохиолдуулан Их-Залуу багт “Энхжихмандариваа”,
Баянбулаг багт “Нийцэл” ӨЭМТ, Баянцагаан багт “Багийн нэгдсэн байр” ашиглалтад
орж нээлтээ хийнэ.
Мөн “Соёлыг түгээе” сарын аяны хаалтыг хийж Монгол Улсын Ерөнхийлөгчийн
зөвлөх Д.Бум-Очир “Аялгуут” сэдвээр “Уурхайчин” соёлын ордонд лекц тавина.
2017 онд аймгийн ИТХ-ын Тэргүүлэгчдийн хурлаар жил бүрийн 12 дугаар сарын
11-нд “Эрдэнэт хотын өдөр”-ийг тэмдэглэх шийдвэр гарсны дагуу Орхон аймаг тав
дахь жилдээ уг өдрийг тэмдэглэх гэж байна. Энэ жил олон нийтийг хамарсан үйл ажиллагаа зохион байгуулахгүй ч уламжлалт ёсоор “Анхдагч Илгээлтийн эзэд”, “Найрамдлын
өндөрлөг” хөшөөнд цэцэг өргөнө. Мөн баярын хурал, концерт болно.
1975 оны 12 дугаар сарын 11-нд Ардын Их Хурлын Тэргүүлэгчдийн зарлигаар
Булган аймгийн Эрдэнэт хороог улсын зэрэглэлтэй хот болгохоор шийдвэр гарсны
дагуу Эрдэнэт хотыг байгуулсан түүхтэй.
