ДЭМБ-аас эх, нярайн эмчилгээнд нэн шаардлагатай тоног төхөөрөмж гардуулав

Монголын мэдээ | Эрүүл мэнд
bolor@montsame.mn
2021-11-23 11:39:12

Улаанбаатар /МОНЦАМЭ/. ДЭМБ-аас 13 нэр төрлийн багаж тоног, төхөөрөмжийг Нийслэлийн Өргөө, Хүрээ, Амгалан амаржих газар болон Архангай, Баянхонгор, Дорноговь, Завхан, Увс, Ховд, Хөвсгөл, Хэнтий аймгийн төрөх тасгуудад хүлээлгэн өглөө.

 

Тус тоног төхөрөөмжид эх, нярайн тусламж, үйлчилгээнд нэн шаардлагатай тоног төхөөрөмж болох хөгжлийн бэрхшээлтэй иргэнд зориулсан төрөх ор, нярайн дулаацуулах ширээ, нярайн шарлалтын эмчилгээний аппарат,  өвчтөний монитор, автомат тариурын шахуурга зэрэг багтжээ.

 

Тоног төхөөрөмж гардуулах ёслолд Эрүүл мэндийн сайд С.Энхболд, ДЭМБ-ын суурин төлөөлөгч Сергей Диордица нар оролцон Нийслэлийн Өргөө, Хүрээ, Амгалан амаржих газар болон орон нутгийн төлөөлөл Төв аймгийн Эрүүл мэндийн газарт хүлээлгэн өглөө.

 

Энэ үеэр Эрүүл мэндийн сайд С.Энхболд хэлэхдээ, “Энэ хүнд цаг үед санхүү болон техникийн туслалцаа үзүүлж байгаа ДЭМБ-д талархахын зэрэгцээ Засгийн газрын 2021 оны 11 дүгээр сарын 17-ны хуралдааны шийдвэрээр нийслэлийн амаржих газруудыг Эрүүл мэндийн яамны харьяанд авсан. Учир нь эх, хүүхдийн эрүүл мэнд нь аливаа улс орны хөгжил, хүн амын эрүүл мэндийн түвшинг илтгэдэг гол үзүүлэлт тул Монгол Улсын Засгийн газар, Эрүүл мэндийн яам эх, нярайн эрүүл мэндэд онцгой анхаарч байна. Нийслэлийн амаржих газрууд нь Нийслэлийн Эрүүл мэндийн газрын харьяа байгууллага байсан бөгөөд ЭМЯ-ны харьяанд шилжсэнээр эх барихын тусламж, үйлчилгээг нэгдсэн удирдлага, зохион байгуулалтаар хангаж, хөрөнгө оруулалтыг нэмэгдүүлэн хүний нөөцийг чадавхжуулснаар тусламж, үйлчилгээний чанар сайжирч “Дэлхийн тогтвортой хөгжлийн зорилт-2030”, “Алсын хараа-2050”-д хүрэхэд чухал алхам болно гэж үзэж байна. Эх, нярайн тусламж, үйлчилгээнд нэн шаардлагатай тоног төхөөрөмжөөр хангах үйл ажиллагааг үе шаттай явуулна” гэдгээ онцлон тэмдэглэв.

 


Холбоотой мэдээ