“Газпром” Монголын нутгаар дайруулан тавих хийн хоолойн төслийн судалгааг баталжээ

Дэлхийд | Нийгэм
Jargal.d@montsame.mn
2021-04-13 14:01:11

МОСКВА. /TASS/. ОХУ-ын байгалийн хийг БНХАУ-д нийлүүлэх “Сибирийн хүч-2” хий дамжуулах хоолойн Монгол Улсын нутгаар дайран өнгөрөх хэсэг болох "Союз Восток" хоолойн төслийн техник-эдийн засгийн судалгааг /ТЭЗС/ баталсан тухай "Газпром" компани мэдээлжээ.


“ТЭЗС-ны хүрээнд төслийн техник, технологийн үндсэн үзүүлэлтүүдийг боловсрууллаа. Тодруулбал, Монгол Улсын нутаг дэвсгэрээр дамжин өнгөрөх илүү тохиромжтой маршрутыг тодорхойлж, түүний урт, диаметр, даралтын хүч, шахагч станцуудын тоог гаргасан. Энэхүү төслийг хэрэгжүүлэхэд эдийн засгийн зохих үр ашгаа өгөх урьдчилсан тооцоо гарсан” гэж мэдээлэлд дурджээ.


“Союз Восток” хий дамжуулах хоолой тавих төслийн хөрөнгө оруулалт, ашиглалтын зардлын нарийвчилсан тооцоог багтаасан техник-эдийн засгийн үндэслэлийг /ТЭЗҮ/ урьд нь төлөвлөсний дагуу энэ оны эцэс гэхэд боловсруулж дуусна.


Энэхүү ТЭЗҮ-ийг 2021 оны эхээр Монгол Улсад бүртгүүлсэн "Газопровод Союз Восток" тусгай зориулалтын компани боловсруулж байна. Тус компанийг "Союз Восток" хоолойн зураг төсөл-хайгуул шинжилгээ, техник эдийн засгийн үндэслэлийг боловсруулах зорилгоор байгуулсан юм.


ОХУ-ын  "Газпром" компани болон Монгол Улсын Засгийн газар 2019 оны 12 дугаар сард харилцан ойлгоцлын санамж бичигт гарын үсэг зурсан билээ. Энэхүү санамж бичгийн хүрээнд хамтарсан ажлын хэсэг байгуулсан бөгөөд ажлын хэсгийн 2021-2022 оны үйл ажиллагааны төлөвлөгөөг 2021 оны гуравдугаар сарын 11-нд баталсан юм. 


“Сибирийн хүч-2” хий дамжуулах хоолойн экспортын хүчин чадал "Сибирийн хүч-1” хий дамжуулах хоолойноос 1.3 гаруй дахин давж магадгүй байна. Энэ нь Оросын байгалийн хийг Баруун Сибириэс баруун төдийгүй зүүн чиглэлээр их хэмжээгээр экспортлох боломжийг олгоно.


Холбоотой мэдээ