Бөхийн таван төрлийг илтгэсэн хөшөө босгов
ОРОН НУТГИЙН МЭДЭЭ | ДОРНОДДорнод /МОНЦАМЭ/. Цагаан-Овоо суманд бөхийн таван төрлийг илтгэн харуулсан хөшөө босгожээ. Тодруулбал, үндэсний бөхийн ахмад зүтгэлтэн, Монгол Улсын гавьяат дасгалжуулагч, улсын начин Г.Пүрэв-Очирын санаачилгаар халх, буриад, барга, үзэмчин, самбо бөхийн онцлог, дэг жаягийг илтгэсэн хөшөөг боржин чулуугаар урласан байна.
Г.Пүрэв-Очир гуай өөрийн тоонот нутаг Цагаан-Овоо уулан дээрээ “Бөхийн үндэсний хүрээлэн” байгуулахаар зорьж байгаа хүн юм. Энэ үйл хэргийнхээ эхлэл гэдгийг тэрээр онцолж байлаа. Энэхүү хөшөөг "Боржин суварга" ХК-д захиалан бүтээлгэжээ.
“Бөхийн үндэсний хүрээлэн” төслөө гурван жилийн өмнө санаачлан эхлүүлсэн аж. Үүнээс өмнө “Дөрвөн угсаатны бөхийн спортын соёлыг хөгжүүлэх” төслийг санаачилсан нь өдгөө найм дахь жилдээ амжилттай үргэлжилж байна.