БОАЖ-ын сайд Н.Цэрэнбат Сэлэнгэ аймагт ажиллалаа

ОРОН НУТГИЙН МЭДЭЭ | СЭЛЭНГЭ
otgontsetseg@montsame.mn
2019-12-18 10:01:36

Сэлэнгэ /МОНЦАМЭ/. Байгаль орчин, аялал жуулчлалын сайд Н.Цэрэнбатаар ахлуулсан ажлын хэсэг энэ сарын 17-нд Сэлэнгэ аймагт ажиллалаа.

Ажлын хэсэг Уул уурхай, хүнд үйлдвэрийн яам, Мэргэжлийн хяналтын ерөнхий газар, Тагнуулын ерөнхий газар, Цагдаагийн ерөнхий газар, МҮОНРТ-ийн бүрэлдэхүүнтэйгээр ажиллалаа. Ажлын хэсэг Ерөө, Хүдэр сум, Бугант тосгонд ажиллаж, уул уурхайн нөхөн сэргээлтийн үйл ажиллагааг газар дээрээс нь харж танилцсан байна. Үүний дараа ажлын хэсгийнхэн аймгийн төв Сүхбаатар суманд ирж Сэлэнгэ аймгийн Засаг дарга Ш.Оргил, Засаг даргын орлогч Ж.Сайнцог болон хэлтэс агентлагын дарга, удирдлагуудтай уулзаж ярилцлаа. Тэд байгаль орчин, уул уурхайн чиглэлээр тулгарч буй асуудлууд болон цаашид хэрхэн хамтарч ажиллах талаар санал бодлоо солилцлоо.

Салбарын сайд өмнө нь 9-р сард Сэлэнгэ аймагт ажиллахдаа Ерөнхий сайдаас өгсөн чиглэлийн дагуу зарим уул уурхайн чиглэлээр олборлолт хайгуул хийж, байгаль экологийн тэнцвэрт байдлыг алдагдуулж буй аж ахуйн нэгжүүдийн үйл ажиллагааг зогсоож, тусгай зөвшөөрлийг цуцлах шийдвэр гаргасан юм. Мөн тухайн газар нутагт нөхөн сэргээлт хийх зэрэг арга хэмжээнүүдийг авч, цагдаагийн хамгаалалттай зохион байгуулж ажиллахыг аймгийн удирдлагуудад даалгасан билээ.

 

 

Холбоотой мэдээ