Улаанбаатар
Монголын хүн ам 2018 онд 61 мянга 600 хүнээр нэмэгджээ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Монгол Улсын хүн ам 2018 оны эцэст урьдчилсан дүнгээр 3.2 сая болж, өмнөх оноос 61 мянга 600 (1.9 хувь)-аар нэмэгджээ.
Улсын хэмжээнд 2018 оны байдлаар 78 993 хүүхэд төрсний 77528 (98.1 хувь) нь Монгол Улсад, 1465 (1.9 хувь) нь хилийн чанадад төрсөн байна. Төрсөн хүүхэд өмнөх оноос 3259 (4.3 хувь)-ээр, нас барсан хүн 1518 (9.6 хувь)-аар тус тус олширчээ.
Монгол Улсын 1000 хүнд ногдох төрөлт 24.4, нас баралт 5.4, ердийн цэвэр өсөлт 19.0 болсон байна. 1000 хүнд ногдох төрөлт өмнөх оноос 0.6 пункт, нас баралт 0.4 пункт, хүн амын ердийн цэвэр өсөлт 0.2 пунктээр тус тус өсчээ.
Харин 1000 хүнд ногдох төрөлт Баян-Өлгий, Ховд, Говьсүмбэр, Орхон аймагт болон Улаанбаатар хотод улсын дунджаас 1.5-3.4 пунктээр дээгүүр, бусад аймагт 0.2-12.3 пунктээр доогуур байна. 1000 хүнд ногдох нас баралт Хөвсгөл, Дорноговь, Дундговь, Сүхбаатар, Баянхонгор, Өвөрхангай аймаг болон Улаанбаатар хотод улсын дунджаас 0.1-0.5 пунктээр дээгүүр, харин Архангай, Дархан-Уул, Дорнод, Увс аймагт ижил түвшинд, бусад аймагт 0.1-1.8 пунктээр доогуур байгаа юм.
Улсын хэмжээнд 1000 хүнд ногдох ердийн цэвэр өсөлт Баян-Өлгий, Говьсүмбэр, Ховд, Орхон аймагт болон Улаанбаатар хотод улсын дунджаас 2.0-4.0 пунктээр дээгүүр, бусад аймагт 0.2-11.9 пунктээр доогуур байна.
