Montsame News Agency

ИНФОГРАФИК

МОНЦАМЭ: Дэлхий дахинд 2024 онд өрнөсөн онцлох үйл явдлууд

УЛААНБААТАР, 2024 оны арванхоёрдугаар сарын 14 /МОНЦАМЭ/. Үндэсний мэдээллийн МОНЦАМЭ агентлаг улирч буй 2024 онд дэлхий дахинд өрнөсөн онцлох үйл явдлуудаас нэрлэж байна /сар, өдрийн дарааллаар/.

1.Швед улс албан ёсоор НАТО-д элслээ

Гуравдугаар сарын 7-ны өдөр Швед улсын Ерөнхий сайд Ульф Кристерссон холбогдох баримт бичгүүдийг АНУ-ын Төрийн нарийн бичгийн дарга Э.Блинкенд хүлээлгэн өгснөөр сүүлийн хоёр жилийн турш үргэлжилсэн НАТО-д элсэх үйл явц дуусгавар болж, Швед улс хойд Атлантын эвслийн 32 дахь гишүүн боллоо.

2.В.Путин ОХУ-ын ерөнхийлөгчөөр дахин сонгогдов

Гуравдугаар сарын 15-17-ны өдрүүдэд болсон сонгуулийн санал хураалтад тэрбээр сонгогчдын 87.28 хувийн санал авч, 5 дахь удаагаа ОХУ-ын Ерөнхийлөгчөөр сонгогдож, 5 дугаар сарын 7-ны өдөр тангараг өргөлөө.

3.Израилын ба ХАМАС-ын удирдагчдыг баривчлах хүсэлт гаргав

Тавдугаар сарын 20-ны өдөр Олон улсын Эрүүгийн шүүхийн прокуророос Израилын Ерөнхий сайд Б.Нетаньяху, Батлан хамгаалахын сайд И.Галлант нар болон ХАМАС бүлэглэлийн гурван удирдагчийг дайны гэмт хэрэг үйлдсэн хэргээр баривчлах тушаал гаргах хүсэлтийг тус шүүхэд тавьжээ. Үүнээс яг 6 сарын дараа Хааг дахь Олон улсын эрүүгийн шүүх хүсэлтийг хүлээн авч, баривчлах тушаал гаргалаа.

4.АНУ-ын ерөнхийлөгчийн сонгуульд Дональд Трамп ялав

Сонгуулийн өмнө явуулсан олон удаагийн санал асуулгаар Д.Трамп болон АНУ-ын дэд Ерөнхийлөгч К.Харрис нар эн тэнцүү өрсөлдөнө гэсэн дүр зураг гарч байсан боловч 11 дүгээр сарын 6-нд болсон сонгуульд Д.Трамп сонгогчдын коллегийн 312 гишүүний саналыг авснаар илт давуу яллаа. Харин сонгуульд ялахын тулд 270 гишүүний саналыг авахад хангалттай бөгөөд түүний өрсөлдөгч Камала Харрис 226 санал авчээ. Ингэснээр Д.Трамп дөрвөн жил завсарласны эцэст дахин Ерөнхийлөгчөөр сонгогдсон Америкийн түүхэн дэх хоёр дахь улстөрч боллоо.

5.БНСУ-д онц байдал зарлав

Арванхоёрдугаар сарын 3-ны өдөр БНСУ-ын Ерөнхийлөгч Юн Сог Ёль улс орондоо онц байдал зарлаж “сөрөг хүчнийхэн төрийн эсрэг үйл ажиллагаа явуулж, засгийн газрын хэвийн үйл ажиллагаанд саад учруулж байгаа учраас уг шийдвэрийг гаргасан” гэдгээ мэдэгдлээ. Энэ бол 1980 онд тус улсад гарсан төрийн эргэлтээс хойш анх удаа онц байдал зарласан тохиолдол байв.

Онц байдал зарласан даруйд тус улсын Үндэсний Ассамблейн гишүүд парламентын ордонд цугларч, Ерөнхийлөгчийн шийдвэрийг цуцлахын төлөө саналаа өгчээ. Хэдхэн цагийн дараа Юн Сог Ёль онц байдал тогтоох тухай зарлигаа хүчингүй болгосон юм. Үүнээс 11 хоногийн дараа БНСУ-ын Ерөнхийлөгч Юн Сог Ёлийг онц байдал зарласантай холбогдуулан огцруулах үйл явцыг эхлүүлэхийг /импичмент/ Үндэсний Ассамблей дэмжсэнээр Үндсэн хуулийн цэц түүнийг албан тушаалд нь эргүүлэн томилох эсвэл огцруулах эсэхийг шийдэх хүртэл бүрэн эрхийг нь түдгэлзүүллээ.

6.Сирийн сөрөг хүчнийхэн Башар аль-Асадын дэглэмийг түлхэн унагав

Саяхныг хүртэл Сирийн талаар дэлхийн мэдээллийн агентлагууд бараг мэдээлэхгүй байсан бол 11 дүгээр сарын сүүлчээс хойш 11 хоногийн дотор сөрөг хүчнийхэн Алеппо, Хама, Хомс хотуудыг, 12 дугаар сарын 8-ны өдөр нийслэл Дамаск хотыг эзлэн авч, Башар аль-Асадын дэглэмийг түлхэн унагасан нь дэлхийн хамтын нийгэмлэгийн хувьд гэнэтийн үйл явдал байлаа.

Сирийн Ерөнхийлөгч Башар аль-Асад нийслэл Дамаск хотыг орхин гарч, ИЛ-76 нисэх онгоцоор ОХУ-ын нийслэл Москва хотод очжээ. Нийслэлийг эзлэн авсан сөрөг хүчнийхэн Сирийн шилжилтийн түр засгийн газрыг байгуулсан байна. Ийнхүү Сири улсын түүхэнд шинэ хуудас нээгдэж, Асадын гэр бүлийнхний 54 жил үргэлжилсэн засаглал төгсгөл болов.

7.COP 29: Хөгжиж буй орнуудад олгох санхүүжилтийг гурав дахин нэмэгдүүлэв

Уур амьсгалын өөрчлөлтийн асуудлаарх НҮБ-ын 29 дүгээр бага хурал /COP29/ “Ногоон дэлхий ертөнцийн төлөөх эв нэгдэл” сэдвийн хүрээнд /11 дүгээр сарын 11-22-ны өдрүүдэд Азербайжан улсын нийслэл Баку хотноо боллоо.

Бага хурлын үеэр өндөр хөгжилтэй орнууд уур амьсгалын өөрчлөлттэй тэмцэхэд нь дэмжлэг болгож хөгжиж буй улсуудад жил бүр 300 тэрбум ам.доллароос доошгүй хэмжээний санхүүжилт олгох үүргийг хүлээжээ. Өмнө нь санхүүжилтийн хэмжээ 100 тэрбум ам.доллар байсантай харьцуулахад энэ бол 3 дахин өссөн тоо юм.

8.“Oдиссей” хөлөг Саран дээр амжилттай газардлаа

Хоёрдугаар сарын 22-ны өдөр Америкийн “Intuitive Machines” компанийн “Nova-C” буюу “Odysseus” гэдэг нэртэй буугч төхөөрөмж Сарны өмнөд туйлын орчимд амжилттай газарджээ.

Энэ нь 1972 онд НАСА-гийн “Аполлон 17” хөлгийн буугч төхөөрөмж Саран дээр газардсанаас хойш 52 жилийн дараа Америкийн сансрын хөлөг Дэлхийн дагуул дээр газардсан анхны, мөн хувийн компани анх удаагаа төхөөрөмжөө Сар руу илгээсэн тохиолдол боллоо.

9.Парисын Эх дагинын сүмийг нээв

2019 оны дөрөвдүгээр сард гал түймэрт сүйдсэн Парисын Эх дагинын сүмийг таван жилийн турш сэргээн засварласны эцэст 12 дугаар сарын 7-ны бямба гарагт дахин нээлээ. Нээлтийн ёслолд оролцохоор дэлхийн 40 гаруй улсын төр, засгийн тэргүүн нар Францын нийслэлд хүрэлцэн очжээ.

Сэргээн засварлах нөр их ажилд 1000 гаруй урчууд гар бие оролцож, дэлхий даяар 880 сая гаруй ам.долларын хандив цуглуулсан байна.

10.Францын нийслэл Парис хотноо зуны Олимпын XXXIII наадам болов

Хүн төрөлхтний эв нэгдлийн бэлгэдэл болсон Олимпын наадмын гал 7 дугаар сарын 26-ны өдөр Парис хотын тэнгэрт бадамлан ассанаар орчин цагийн Олимпын хөдөлгөөнийг үндэслэгч, их соён гэгээрүүлэгч Пьер де Кубертений эх нутагт нэгэн зууны дараа Олимпын их наадам гурав дахь удаагаа эхэллээ.

Зуны 33 дахь удаагийн Олимпын тоглолтыг нээх ёслолыг түүхэнд анх удаагаа Цэнгэлдэх хүрээлэнд бус, гол мөрний эрэг дагуу зохион байгуулсан нь онцгой содон үйл явдал байв. Парисын төвөөр урсах Сена мөрнөөр 206 улсын баг тамирчдын хөлөглөсөн завины цуваа явж өнгөрсөн бөгөөд энэ гайхамшигт ёслолыг 300 мянга гаруй хүн дэргэдээс нь үзэж сонирхжээ.

2023 он: Дэлхий дахинаас онцлохуй

УЛААНБААТАР, 2023 оны арванхоёрдугаар сарын 30 /МОНЦАМЭ/. Монголын үндэсний мэдээллийн МОНЦАМЭ агентлаг дэлхий дахинд болсон 2023 оны онцлох үйл явдлуудаас нэрлэж байна.

1.НАТО хүрээгээ тэллээ

Умард Атлантын гэрээний байгууллага буюу НАТО байгуулагдсанаас хойш яг 74 жилийн дараа Финланд улс тус эвслийн 31 дэх гишүүн боллоо.

Дөрөвдүгээр сарын 4-ний өдөр Финландын Гадаад хэргийн сайд Пекка Хаависто албан ёсны баримт бичгүүдийг АНУ-ын Төрийн нарийн бичгийн дарга Э.Блинкенд гардуулан өгснөөр тус улс эвсэлд нэгдэх үйл явц дуусав.

Үүнтэй холбогдуулан НАТО-гийн Ерөнхий нарийн бичгийн дарга Й.Столтенберг хэлэхдээ “Финланд илүү аюулгүй, НАТО илүү хүчирхэг боллоо” хэмээн дүгнэжээ.

Өнгөрсөн оны хоёрдугаар сард Оросын арми Украинд халдан довтолсны дараа Финланд улс 75 жилийн турш баримталж ирсэн төвийг сахих бодлогоосоо татгалзаж, хөрш Шведийн хамт НАТО-д элсэх хүсэлтээ гаргасан юм.

НАТО-д гишүүнээр элсэх хүсэлтийг эвслийн гишүүн бүх улсын парламент соёрхон батлах ёстой. Харин Швед, Финландын хүсэлтийг дэмжихээс Унгар, Турк хоёр цааргалсаар байв. Гэвч олон удаагийн яриа хэлэлцээ, харилцан айлчлалуудын дүнд хоёр улсын парламентууд Финландын гишүүнчлэлийг дэмжсэн шийдвэрийг гаргалаа. Харин Шведийн хувьд яг хэзээ НАТО-д элсэх нь тодорхойгүй хэвээр байна.

2.Цар тахлын онцгой байдлыг цуцаллаа

COVID-19 халдварын тархалттай холбогдуулан 2020 оны нэгдүгээр сарын 30-нд олон улсын хэмжээнд зарласан онцгой байдлыг ДЭМБ энэ оны тавдугаар сарын 5-ны өдөр цуцаллаа. Үүнээс 4 сарын өмнө буюу нэгдүгээр сарын 8-ны өдөр БНХАУ-д хөл хорионы дэглэмийг цуцалсан юм.

ДЭМБ онцгой байдал зарласнаас хойш гурван сар тутамд шинжээчдийн хороог хуралдуулан онцгой байдлыг сунгасаар ирсэн бөгөөд 15 дахь хуралдааны явцад хөл хорионы дэглэмийг цуцаллаа.

Бүхэл бүтэн гурван жилийн турш үргэлжилж, хүн төрөлхтнийг айдаст автуулж байсан цар тахлын аюул ийнхүү ард хоцорч, дэлхийн улс орнууд хэвийн амьдралын горимд бүрэн шилжив.

2020 оны гуравдугаар сард ДЭМБ “COVID-19”-ийг цар тахал гэж албан ёсоор зарласнаас хойш 2023 оны 12 дугаар сарын эхний хагас хүртэлх хугацаанд дэлхийн хэмжээнд халдварын 772 сая гаруй тохиолдол бүртгэгдэж, 6.9 сая гаруй хүн нас баржээ.

3.70 жилийн дараа шинэ хаан сэнтийдээ залрав

Их Британи, Умард Ирландын Нэгдсэн Хаант Улсын хаан III Чарльзыг албан ёсоор хаан сэнтийд залах ёслол Лондон хотын Вестминстерийн сүмд тавдугаар сарын 6-нд боллоо.

Тус улсыг хамгийн удаан буюу 70 жил удирдсан Эрхэмсэг хатан хаан II Елизабет 96 насандаа таалал төгссөнөөс найман сар орчмын дараа түүний ууган хүү Уэльсийн хунтайж Чарльз Филипп Артур Жоржийг 40 дэх хаанаар өргөмжлөв. Өдгөө 74 настай тэрбээр Британийн хаан сэнтийд заларсан хамгийн өндөр настай хүн болж байна.

Ингэснээр хунтайж Чарльз албан ёсоор 14 тусгаар тогтносон улсын хаан боллоо. Үүний зэрэгцээ тэрбээр Хамтын нөхөрлөлийн орнуудын төрийн тэргүүний үүргийг гүйцэтгэнэ.

Хаан сэнтийд залах ёслолд дэлхийн 100 орчим улсын төр, засгийн тэргүүн нар, 203 орны 2000 гаруй зочид төлөөлөгчид уригдан оролцов. Ёслолыг дамжуулсан шууд нэвтрүүлгийг 20 сая хүн үзжээ.

Хоёр цаг үргэлжилсэн ёслолын оргил мөчид III Чарльз хаан христосын шашны судар дээр гараа тавин хааны тангараг өргөлөө.

4.Хиймэл оюун ухааны үсрэнгүй хөгжил ба эрсдэл

Том хэлний загварт суурилсан хиймэл оюун ухаант чатбот буюу ChatGPT-г 2022 онд бүтээснээс хойш бичвэр үүсгэх, орчуулга хийх, асуултад хүнтэй адил хариулах, шүлэг, хөгжмийн зохиол гэх мэт бүтээлч контентүүд хийх, хүмүүстэй сонирхолтой байдлаар чатлах зэрэг олон төрлийн даалгаврыг гүйцэтгэж чаддаг болжээ. Тодорхой хэлбэл, 2023 онд гарсан ChatGPT-ийн сүүлчийн хувилбар нь анхны хувилбараас 10 дахин илүү боловсронгуй болсон тул төр засгийн байгууллагууд, компаниуд, хувь хүмүүс уг чатботыг өргөнөөр ашиглаж эхэллээ.

AI технологи асар хурдтай хөгжиж байгаа нь хүний бүтээлч чадварыг цоо шинэ шатанд гаргана гэж зарим хүмүүс үзэж байгаа бол хиймэл оюун нь ажилгүйдэл ба нийгмийн тэгш бус байдлыг даамжруулж, тэр ч бүү хэл хүн төрөлхтнийг мөхөлд хүргэж болзошгүй хэмээн болгоомжлох хүмүүс ч бий.

5.Цахилгаан автомашины эрин үе эхэллээ

Энэ оны эхээр цахилгаан автомашины үнэ огцом унаснаар борлуулалт нь 2023 оны эхний 9 сарын байдлаар 34 хувиар өсжээ.

2023 онд дэлхий даяар борлуулах 5 автомашин тутмын нэг нь цахилгаан автомашин байх бөгөөд үйлдвэрлэл 35 хувиар нэмэгдэж, 14 саяд хүрнэ гэж Олон улсын эрчим хүчний агентлагийн таамагласантай дээрх тоо тун дөхөж очих нь. Дотоод шаталтын хөдөлгүүрээс цахилгаан хөдөлгүүрт шилжсэнээр 2030 он гэхэд дэлхий даяар өдөр бүр 5 сая баррель газрын тос хэмнэгдэнэ гэж тус агентлаг тооцоолсон юм.

Өнөөдрийн байдлаар БНХАУ, АНУ, Европын Холбоо дэлхийн зах зээлд давамгайлж байгаа бөгөөд тэр дундаа Хятад улсад дэлхий даяар худалдаалж буй цахилгаан автомашины 55 хувь нь ногдож байна.

6.Газар хөдлөлтийн гамшиг дагуулсан жил

Энэ онд газар хөдлөлт болон байгалийн гамшигт үзэгдлүүд ойр ойрхон тохиолоо. Тухайлбал, Турк, Сири, Афганистан, Марокко, Эквадор улсуудад хүчтэй газар хөдлөлтүүд болов.

Хамгийн хүчтэй нь хоёрдугаар сарын 6-ны өдөр Туркэд болж, 48 мянга гаруй хүн амь насаа алдаж, 500 мянга гаруй барилга байшин, дэд бүтцийн байгууламжууд эвдрэн сүйдэж, тус улсын эдийн засагт 100 гаруй тэрбум долларын хохирол учирчээ.

Мөн Марокко улсад есдүгээр сарын 8-ны өдөр 6.8 магнитудын хүчтэй, Афганистан улсад 10 дугаар сарын 7-нд 6.3 магнитудын хүчтэй газар хөдлөлтүүд болж, олон мянган хүний аминд хүрлээ.

Хамгийн сүүлд гэхэд, Говь-Алтай аймагтай хил залгаа Хятад улсын Гансү муж болон Чинхай мужид 6.2 магнитудын хүчтэй газар хөдлөлт болсны улмаас 131 хүн амиа алджээ.

7.Энэтхэгийн буугч аппарат Саран дээр амжилттай газардав

Долоодугаар сарын 14-ний өдөр Энэтхэг улсын хөөргөсөн “Чандраян-3” сансрын станцын “Викрам” буугч аппарат Сарны гадаргуу дээр амжилттай бууснаар тус улс АНУ, ЗХУ, БНХАУ-ын дараа Саран дээр сансрын төхөөрөмжөө зөөлнөөр газардуулж чадсан дөрөв дэх улс, Сарны өмнөд туйлд аппаратаа буулгаж чадсан анхны улс боллоо.

Өмнө нь 2019 онд Энэтхэг улс хоёр удаа Сар руу аппаратаа илгээж, зөөлөн газардуулахаар оролдсон боловч бүтэлгүйтэж байв.

8.Эмэгтэйчүүдийн хөл бөмбөгийн ДАШТ ба үнсэлтийн дуулиан

Эмэгтэйчүүдийн хөл бөмбөгийн дэлхийн аварга шалгаруулах ес дэх удаагийн тэмцээн Австрали, Шинэ Зеланд улсуудад долоодугаар сарын 20-ноос наймдугаар сарын 20-нд боллоо.

Өмнө нь 24 баг оролцдог байсан тус тэмцээнд анх удаа 32 баг өрсөлдсөн юм.

Тэмцээний шувтаргын тоглолт Сидней хотын “Stadium Australia” цэнгэлдэх хүрээлэнд болж, Испанийн шигшээ баг англи бүсгүйчүүдийг 1:0 харьцаагаар буулган авснаар анх удаагаа дэлхийн аварга гэдэг цолыг хүртлээ.

Гэтэл аваргын цомыг гардуулах ёслолын үеэр Испанийн хөл бөмбөгийн холбооны тэргүүн Луис Рубиалес довтлогч Ж.Хермосогийн уруул дээр чанга үнссэн нь спортын ертөнцөд багагүй дуулиан дэгдээв.

Эл шалтгаанаар өдгөө 46 настай Л.Рубиалес Испанийн хөл бөмбөгийн холбооны тэргүүний болон УЕФА-гийн Гүйцэтгэх хорооны дэд ерөнхийлөгчийн албан тушаалаас огцрохоос аргагүйд хүрчээ.

9.ХАМАС-ын гэнэтийн дайралт, Израилын хариу цохилт

10 дугаар сарын 7-ны өдөр ХАМАС тэргүүтэй Палестины зэвсэгт бүлэглэлүүд Газын зурвасаас Израил руу бөөн хүчээр гэнэт халдан довтолсон нь Израил төдийгүй Ойрхи Дорнодын нөхцөл байдлыг анхааралтай ажиглаж байдаг бүс нутгийн улс орнууд, дэлхийн томоохон гүрнүүдийг шоконд оруулсан хэрэг байлаа.

ХАМАС бүлэглэл Израил руу 2200 гаруй пуужингаар харвасны дараа олон зуун байлдагчтай зэвсэгт отрядууд Израилын нутагт нэвтэрч, байлдааны зэвсэг техникүүдийг олзолжээ. Гэнэтийн дайралтад өртөн Израилын 1200 орчим иргэн амиа алдаж, 242 хүн барьцаалагдав. Энэ бол Холокостоос хойших еврейчүүдийг олноор нь хөнөөсөн хамгийн том хядлага, Палестины зүгээс хийсэн түүхэн дэх хамгийн том террорист халдлага байв.

Үүний хариуд Израилын засгийн газар 1973 оноос хойш анх удаа улс орондоо дайны байдал зарлаж, Газын зурвасын нутаг дэвсгэрт “Төмөр илд” гэдэг цэргийн ажиллагаа явуулж эхэллээ.

10.Сан байгуулах асуудлыг шийдсэн СОР28

Уур амьсгалын өөрчлөлтийн тухай НҮБ-ын Суурь конвенцын талуудын 28 дугаар бага хурал (COP28) АНЭУ-ын Дубай хотноо 11 дүгээр сарын 30-наас 12 дугаар сарын 12-ны өдрүүдэд болж, дэлхийн 200 орчим орны 70 мянга гаруй төлөөлөгчид хүн төрөлхтний өмнө тулгарч буй хамгийн тулгамдсан асуудал болох уур амьсгалын өөрчлөлтийг хэлэлцлээ.

Бага хурлын эхний өдөр хурлыг зохион байгуулагч АНЭУ-ын Ерөнхийлөгч шейх Мухаммед Бин Заид уур амьсгалын өөрчлөлтөөс үүдэлтэй асуудлуудыг шийдвэрлэхийн тулд 30 тэрбум долларын “ALTÉRRA” сан байгуулсныг зарласан бол Европын Холбоо, Их Британи, АНУ болон бусад хөгжингүй орнууд уур амьсгалын өөрчлөлтийн нөлөөнд өртөж буй ядуу буурай орнуудад туслах зорилгоор 420 сая долларын анхны хуримтлал бүхий “Алдагдал хохирлын сан”-г (Loss and damage fund) байгууллаа. Ингэснээр олон удаагийн СОP хурлуудын үеэр хэлэлцсээр ирсэн сан байгуулах асуудлыг шийдсэнээрээ СОP28 бүтээлч хурал болов.

Колумбид гал зогсоох хэлэлцээр үйлчилж эхэллээ

БУЭНОС-АЙРЕС. /ТАСС/. Пүрэв гаргаас эхлэн хоёр талын хооронд гал зогсоох тохиролцоо үйлчилж эхэлснийг Колумбын засгийн газар ба босогчдын “Үндэсний чөлөөлөх арми” бүлэглэлийн төлөөлөгчид мэдэгдлээ.

Колумбын дотоодод үүссэн зөрчлүүдийг шийдвэрлэх зорилгоор тус улсын засгийн газар "Үндэсний оролцооны хороо"-г байгуулжээ. Тус хорооны үйл ажиллагааны нээлтийн ёслолд оролцсон босогчдын бүлэглэлийн удирдагчдын нэг Пабло Бельтран хэлэхдээ “хяналтын найдвартай механизм бүхий гал зогсоох тохиролцоо өнөөдрөөс үйлчилж эхэлж байна. Хоёр тал тохиролцоог мөрдөн сахих эрмэлзэлтэй байгаа нь хамгийн чухал” гэлээ.

Түүний ярьснаар, эхний зургаан сарын хугацаанд давшилтын ажиллагаа явуулахгүй, зөвхөн хамгаалалтын ажиллагаа явуулах ёстой гэдэг дээр талууд анхаарлаа төвлөрүүлэн ажиллах аж.

2016 онд Колумбын засгийн газар ба босогчдын “Колумбын хувьсгалт зэвсэгт хүчин” гэдэг байгууллагын хооронд гал зогсоох гэрээ байгуулснаас хойш олон мянган хүнийг эгнээндээ нэгтгэсэн “Үндэсний чөлөөлөх арми” /ҮЧА/ босогчдын цорын бүлэглэл болж үлдсэн байна. 2016 оны тохиролцоо нь хагас зуун жилийн турш үргэлжилж, 250 мянга гаруй хүний аминд хүрсэн цуст мөргөлдөөнийг зогсоосон билээ.

Өнгөрсөн оны 11 дүгээр сард Колумбын эрх баригчид ба ҮЧА-ийн хооронд хэлэлцээ эхэлсэн бол энэ оны 6 дугаар сарын 9-нд Кубад хэлэлцээний 3 дахь үе шат дууссанаар талууд 8 дугаар сарын 3-наас ирэх оны 1 дүгээр сарын 29 хүртэл гал зогсоохоор тохиролцжээ.

Дэлхийн 108 улс орон цаазаар авах ялыг бүрэн халсан байна

ЛОНДОН. /Al Jazeera/. Цаазаар авах ялын эсрэг дэлхийн өдрийг тохиолдуулан олон улсын "Эмнести Интернэшнл" байгууллагаас дэлхийн улс орнуудын цаазаар авах ялын 2021 оны тайланг танилцуулсан байна.

Өнгөрсөн оны байдлаар дэлхийн улс орнуудын гуравны хоёроос илүү нь цаазаар авах ялыг бүрэн халсан байна. Тайланд дурдсанаар 108 улс бүх гэмт хэрэгт, 8 улс дайны үед үйлдэгдсэн гэмт хэргээс бусад хэрэгт тус тус цаазаар авах ялыг халсан байна. 83 улс цаазын ялыг хэвээр хадгалж байгаа боловч түүнээс 28 улс нь сүүлийн 10 жилийн хугацаанд цаазын ялыг ногдуулаагүй байна.

Экваторын Гвинейн Бүгд Найрамдах Улсын Ерөнхийлөгч шинээр батлагдсан эрүүгийн хуульд 2022 оны 9-р сарын 20-ны өдөр гарын үсэг зурснаар тус улс цаазын ялыг хамгийн сүүлд халсан улс болсон байна. Тухайн хууль гурван сарын дараа хэрэгжиж эхэлнэ.

SIPRI: Цөмийн зэвсэг хэрэглэх эрсдэл хүйтэн дайнаас хойших хамгийн дээд түвшинд хүрсэн

МОСКВА. /RIA Novosti/. Дэлхий дахинд цөмийн зэвсэг хэрэглэх эрсдэл хүйтэн дайны үеэс хойших хамгийн дээд түвшинд хүрээд байна гэж дэлхийн тулгамдсан асуудлуудыг судалдаг Стокхолмын олон улсын хүрээлэн (SIPRI) тайландаа дурджээ.

Одоогийн байдлаар "цөмийн зэвсгийг хорогдуулах үйл явц дууссаныг илтгэх тодорхой шинж тэмдгүүд ажиглагдаж байгаа" хэдий ч “цөмийн клубын бүх гүрэн (ОХУ, АНУ, Их Британи, Франц, Хятад, Энэтхэг, Пакистан, Израил, БНАСАУ) цэнэгт хошууныхаа тоог нэмэгдүүлж, цөмийн зэвсгээ шинэчлэн сайжруулж байна" гэж тайланд тэмдэглэсэн байна. Тухайлбал, "Өнгөрсөн онд Их Британи цөмийн цэнэгт хошууныхаа нөөцийн хязгаарыг нэмэгдүүлж, тоог нь олон нийтэд мэдээлэхгүй байхаар шийдсэнээ " мэдэгдсэн бол Франц "цөмийн зэвсгээр тоноглогдсон, гурав дахь үеийн шумбагч онгоцыг хөгжүүлэх хөтөлбөрийг албан ёсоор эхлүүлжээ". Түүнчлэн Энэтхэг, Пакистан улсууд "цөмийн зэвсгийнхээ нөөцийг нэмэгдүүлж, зөөвөрлөх шинэ систем боловсруулж байгаа" бол Израил улс мөн "цөмийн зэвсгээ шинэчилж байгааг" онцолсон байна. Үүний зэрэгцээ БНАСАУ "цөмийн зэвсгийн туршилтыг идэвхтэй явуулж" байгаа билээ. Шинжээчдийн тооцоолж буйгаар, тус улс "хэдийнээ 20 цэнэгт хошуу үйлдвэрлэсэн бөгөөд нэмж 45-55 нэгжийг үйлдвэрлэх хангалттай нөөцтэй болжээ". Эцэст нь SIPRI -ийн шинжээчид Хятадад пуужин хөөргөх 300 шинэ цооног барих ажил үргэлжилж байгааг хиймэл дагуулын зургууд харуулсныг дурдсан байна.

Ойрын арван жилд цөмийн зэвсгийн нөөц нэмэгдэнэ гэж шинжээчид таамаглаж байна. Хэрэв одоогийн чиг хандлага энэ хэвээр үргэлжилбэл хүйтэн дайнаас хойш анх удаа дэлхийн цөмийн цэнэгт хошууны тоо нэмэгдэж эхлэх төлөвтэй байна.

Халдвар авсан хүний тоо 499 сая давлаа

ВАШИНГТОН. /Worldometers/. Дэлхий дахинд “COVID-19” халдварын тохиолдлын тоо 499 сая 132 мянга давж, эдгэрсэн хүний тоо 448 сая 452 мянгад хүрлээ.