Ulaanbaatar
Балетчнаас дэлхийн хамгийн залуу тэрбумтан эмэгтэй болсон-Луана Лопез Лара
ДЭЛХИЙН МЭДЭЭ | НИЙГЭМ
ВАШИНГТОН, 2025 оны арванхоёрдугаар сарын 5 /Kazinform/. Бразилын бизнес эрхлэгч Луана Лопез Лара өөрийн хөдөлмөрөөр тэрбум ам.долларын хөрөнгө босгосон хамгийн залуу тэрбумтан эмэгтэй болжээ. Тэрбээр 29 настайдаа энэ амжилтад хүрсэн бөгөөд түүний Kalshi компани нь түүхэн дээд хэмжээний хөрөнгө оруулалт татаж, зах зээлийн үнэлгээ нь 11 тэрбум долларт хүрсэн байна.
Лара Kalshi компаниа 2018 онд Массачусетсийн технологийн хүрээлэнд суралцаж байхдаа Тарек Мансур гэдэг залуутай хамтран байгуулсан байна. Хэдхэн жилийн дотор энэхүү стартап нь АНУ-ын хамгийн хурдтай хөгжиж буй финтек платформуудын нэг болжээ.
Саяхан тус компани 300 сая ам.долларын хөрөнгө оруулалт татсан бол хоёр сарын дараа дахин 1 тэрбум ам.доллар босгожээ. Ингэснээр Kalshi-гийн үнэлгээ 5 тэрбум ам.долларт хүрсэн бөгөөд дараагийн хөрөнгө оруулалтын дараа 11 тэрбум ам.доллар болж өссөн байна.
Финтек салбарт хөл тавьсан Ларагийн замнал ер бусын байв. Бразилын Их театрын сургуульд мэргэжлийн балетчнаар суралцаж байсан тэрбээр мэргэжлээ бүрмөсөн өөрчилж технологи, санхүүгийн салбарыг сонгожээ.
Компани нь хурдтай хөгжиж дэвшсэн нь хөрөнгө оруулагчдын итгэл, мөн бизнеснийхээ хүрээг хурдацтай тэлсэнтэй холбоотой гэнэ.
Kalshi компани нь засгийн газраас зохицуулагддаг платформ юм. Уг платформын хэрэглэгчид сонгуулийн үр дүн, эдийн засгийн үзүүлэлтээс эхлээд спорт, соёлын үйл ажиллагаа зэрэг төрөл бүрийн үйл явдлын үр дүнг таамаглаж, гэрээнүүдээр арилжаа хийх боломжтой. 2020 онд АНУ-ын Бараа бүтээгдэхүүний фьючерс гэрээний комиссоос (CFTC) зөвшөөрөл авсны дараа санхүүгийн зах зээлд хууль ёсоор ажиллах боломжтой болж, стартапын статусаас том финтек тоглогч болжээ.
Сүүлийн хөрөнгө оруулалтыг татахад Sequoia Capital, Andreessen Horowitz зэрэг томоохон венчур сангууд дэмжсэн нь Kalshi-гийн бизнес загвар ихээхэн итгэл хүлээж байгааг харуулж байна. Одоо тус компани нь санхүүгийн таамаглалыг бодит үйл явдлуудын таамаглалтай хослуулсан хурдтай хөгжиж буй зах зээлд тэргүүлэх байр суурийг эзэлж байна.
"Бид дэлхийн хамгийн том санхүүгийн биржийг байгуулахыг зорьж байсан тул бизнесээ эхнээс нь хуулийн дагуу бий болгох нь чухал байсан. Тиймээс бид хэзээ ч буулт хийж байгаагүй" гэж тэрбээр онцолжээ.
