Ulaanbaatar
Зургаан өөр ертөнцөөр аялахуй
МОНГОЛЫН МЭДЭЭ | СОЁЛ УРЛАГ
Улаанбаатар, 2025 оны наймдугаар сарын 29 /МОНЦАМЭ/. “Хүрээлэн буй Хязгааргүй” уран бүтээлчдийн хамтарсан үзэсгэлэн “HUE” арт галерейд олны хүртээл болж байна.
Энэ удаагийн үзэсгэлэн нь гурван үеийн төлөөлөл болсон шилдэг таван зураач, нэг барималч өнгөөр тоглосон бүтээлүүдээ дэлгэхдээ бодит реалист зураг, орчин үеийн абстракт, модерн чиглэлийн бүтээл, баримал зэрэг төрөл бүрийн урсгалыг нэг дор багтааснаараа онцлог юм. Үзэсгэлэнд Төрийн соёрхолт, ардын зураач До.Болд, Урлагийн гавьяат зүтгэлтэн Ц.Нарангэрэл, Урлагийн гавьяат зүтгэлтэн Б.Төмөрбаатар, ХБНГУ-д суугаа Монгол Улсын соёлын элч, МУСТА Ц.Ган-Эрдэнэ, СТА зураач С.Базарваань, МУЭ-ийн нэрэмжит шагналт барималч Т.Даваасамбуу нарын уран бүтээлчийн 100 гаруй бүтээлийг олонд хүргэж байна.
Уран бүтээлчид өөр өөрсдийн өнгө аяс, арга барил, оюун ухаанаараа хүрээлэн буй орчноосоо бүтээлийн сэдэл, санааг авч, өнгөний зохиомж, тоглолт ашиглан хязгааргүй боломжийг илэрхийлсэн учир үзэсгэлэнгээ ‘Хүрээлэн буй хязгааргүй’ хэмээн нэрлэжээ.
“HUE” арт галерейн гүйцэтгэх
захирал, зураач Б.Батжин ярихдаа, “Бид өнгөрсөн зургаадугаар сард олон
улсын стандартад нийцсэн, монголдоо жишиг болохуйц галерей байгуулсан.
Шилдэг уран зураач, урлан бүтээгчдийн бүтээлийг мэргэжлийн түвшинд хадгалж,
худалдаалж, нийтэд дэлгэж байна. Цаг хугацаа өнгөрөх тусам уран бүтээлийн үнэ цэн улам
бүр нэмэгддэг. Иймээс үнэт бүтээлийг зөв хадгалж, олон нийтэд таниулан түгээн
дэлгэрүүлэх нь чухал юм. Манай галерей есдүгээр сард Увс аймгийн уран
бүтээлчдийн үзэсгэлэнг толилуулна” гэв.
Ташрамд дурдахад, “HUE” арт галерей нь монголд анх удаа стандартын дагуу уран зураг хадгалах зориулалтын өрөөг бий болгожээ. Тус өрөө нь 200 гаруй бүтээлийг аюулгүй хадгалах боломжтой юм.
“Хүрээлэн буй Хязгааргүй” үзэсгэлэн есдүгээр сарын 18 хүртэл үргэлжлэх аж.
