ДОРНОГОВЬ: Хүүхэд, эх барих эмэгтэйчүүдийн 19 мэс заслыг амжилттай хийжээ
ОРОН НУТГИЙН МЭДЭЭ | ДОРНОГОВЬ
Сайншанд, 2026 оны гуравдугаар сарын 16 /МОНЦАМЭ/. Аймгийн Нэгдсэн эмнэлэгт ЭХЭМҮТ-ийн эмч нарын баг “Эх, хүүхэд, нярайн мэс заслын тусламж” хөтөлбөрийн хүрээнд гуравдугаар сарын 13-15-ны өдрүүдэд ажиллалаа.
Эмч нар хүүхдийн болон нярайн ерөнхий мэс засал, мэдрэлийн мэс заслын үзлэг, оношилгоо, эх барих, эмэгтэйчүүдийн үзлэг, жирэмсний үеийн хавсарсан эмгэгийн оношилгоо, эмэгтэйчүүдийн эмгэгийн мэс заслын үзлэг, мэс заслын дараагийн шатанд хамруулах, зөвлөгөө зэргийг үнэ төлбөргүй хийжээ.
Тодруулбал, хүүхэд, эх барих эмэгтэйчүүдийн 19 мэс заслыг амжилттай хийжээ. Мөн орон нутгийн эмч мэргэжилтнүүдийг чадавхжуулах сургалтыг зохион байгуулснаас гадна үзлэгт хамрагдахаар ирсэн иргэдэд бага насны хүүхдийн эрүүл мэнд, мэдрэлийн эмгэгээс урьдчилан сэргийлэх, эмэгтэйчүүдийн эрүүл мэнд, жирэмсэн болон хөхүүл эх, тэдний гэр бүлд эрүүл мэндийн сургалт, зөвлөгөө өгчээ.
Энэхүү үзлэг оношилгоог аймгийн Засаг даргын ивээл дор "МАК" ХХК-ийн дэмжлэгтэйгээр "Энх мэнд" төслийн хүрээнд зохион байгуулжээ.
