Манай жүдочид багаараа мөнгөн медаль хүртэв
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Жүдо бөхийн 2017 оны насанд хүрэгчдийн ААШТ-ий багийн төрөлд Монголын эмэгтэй, эрэгтэй жүдочид багаараа мөнгөн медаль хүртлээ.
Багийн аварга шалгаруулах тэмцээн тав дахь удаагаа зохион байгуулахад Монгол-Японы эмэгтэй шигшээ баг жил бүр аваргын төлөө өрсөлдөж байгаа. Дөрвөн удаа мөнгөн медаль хүртсэн Монголын эмэгтэй жүдочид энэ удаад Японы багт 4:1-ээр ялагдаж, таван жил дараалан тивдээ финалдаж мөнгөн медалийн эзэн боллоо. Хүрэл медалийг БНСУ, Тайванийн эмэгтэй шигшээ баг хүртлээ.
Жүдо бөхийн 2017 оны насанд хүрэгчдийн АТАШТ-ий багийн төрөлд Монголын эрэгтэй жүдочид анх удаа мөнгөн медалийн эзэд болов. Аваргын төлөөх барилдаанд БНСУ-ын багтай таарч 3:2-оор хожигдлоо.
ОУХМ Г.Хэрлэн 66 кг-д гурван вазари үнэлгээгээр хожиж яваад барилдааны төгсгөлд боох мэхэнд орж цэвэр хожигдсон. ОУХМ Г.Одбаяр 73 кг-д дэлхийн аварга Ан Чангримд вазари үнэлгээгээр хожигдсон бол 81 кг-д Н.Дагвасүрэн багтаа эхний ялалтыг авсан.
Г.Алтанбагана өрсөлдөгчөө вазари үнэлгээгээр ялж яваад гар хөшсөн хэмээн шүүгч эсрэг талд ялалт өгснөөр Монголын баг тивийн аваргад түрүүлэх найдваргүй болсон.
Харин +100 кг-д олимпийн хос медальт Н.Түвшинбаяр аварга Ким Сангвинийг даралтаар цэвэр ялж багтаа хоёр дахь ялалтыг авчирсан юм. Хүрэл медалийг Япон, Ираны эрэгтэй баг хүртлээ.
Д.Өлзий