Улаанбаатар
Өмнөд Солонгосын дадлагажигч эмч нар ажилдаа эргэн орно
ДЭЛХИЙН МЭДЭЭ | НИЙГЭМ
СӨҮЛ, 2025 оны наймдугаар сарын 31 /Yonhap/. Өмнөд Солонгост анагаахын сургуульд элсэгчдийн тоог нэмэгдүүлэх тухай өмнөх засаг захиргааны шийдвэрийг эсэргүүцэн ажлаасаа гарсан дадлагажигч эмч нар ирэх долоо хоногт ажилдаа эргэн орох гэж байгаа талаар анагаахын салбарын эх сурвалжууд өнөөдөр мэдээлжээ.
Дадлагажигч эмч нарыг эргүүлэн ажилд авах хоёрдугаар шатны
ажиллагаа өнгөрсөн долоо хоногт дууссан тул тэд ирэх даваа гаргаас ажилдаа орох
бөгөөд шинээр эсвэл буцаж ажилдаа орсон дадлагажигч эмч нарын нарийвчилсан тоог
Эрүүл мэндийн яамнаас ойрын өдрүүдэд зарлах ажээ.
Сөүлийн “таван том” эмнэлэгт дадлагажигч эмч нарын өргөдөл
гаргах хувь 60-80 хувьд хүрсэн бөгөөд эмнэлэг тус бүрийн квотын 70 орчим хувийг
дүүргэжээ. Өнгөрсөн оны эхээр эсэргүүцлийн жагсаал өрнүүлсэн дадлагажигч
эмч нар ажилдаа эргэн орсноор эмнэлгүүдийн ачааллыг хөнгөвчлөх төлөвтэй байна.
2025 оноос эхлэн анагаахын сургуульд элсэгчдийн тоог 2000-аар
нэмэгдүүлэн 5000 болгох засгийн газрын төлөвлөгөөг эсэргүүцсэн олон мянган
дадлагажигч эмч 2024 оны хоёрдугаар сард ажлаасаа гарч, олон оюутан хичээлээ бойкотолж байв. Харин Засгийн газар энэ оны эхээр шийдвэрээ
өөрчилж, 2026 оны элсэлтийн квотын
өмнөх түвшнийг /3000 орчим/ сэргээсний дараа анагаахын оюутнууд болон дадлагажигч
эмч нар эсэргүүцлээ зогсоохоор шийджээ.
Гэхдээ дадлагажигч эмч нар орон нутгаас илүүтэй нийслэлийн
эмнэлгүүдэд ажиллахыг илүүд үзэж, яаралтай тусламж, хүүхэд, эх барих тасаг гэх мэт чухал салбаруудад ажиллахаас зайлсхийж байгаа тул тодорхой сорилт бэрхшээл
тулгарсан хэвээр байх болно гэдгийг эмнэлгийн салбарын мэргэжилтнүүд хэлж
байна.
