Улаанбаатар
Туркийн Ардын ардчилсан намын гишүүдийг баривчилжээ
ДЭЛХИЙН МЭДЭЭ | УЛС ТӨРАНКАРА. /ВВС/. Курдын талыг баримтлагч, сөрөг хүчний Ардын ардчилсан намын хоёр удирдагчийг парламентын бусад гишүүдийн хамт баривчиллаа гэж Туркийн албаны хүмүүс мэдэгдэв.
Терроризмтой тэмцэх ажиллагааны хүрээнд Селахаттин Демирташ, Фиген Юксекдаг нарыг гэртээ байхад нь баривчилсан гэж Туркийн аюулаас хамгаалах хүчний эх сурвалж мэдэгдсэн байна. Мөн Ардын ардчилсан намаас парламентад сонгогдсон 9 гишүүнийг баривчлан хорьжээ.
Тэднийг баривчлахтай зэрэгцэн “Twitter”, “Facebook”, “YouTube”, “Whatsapp” зэрэг нийгмийн сүлжээний цахим хуудаснуудад нэвтрэх боломжийг хаасан байна. Хэрэглэгчид виртуаль хувийн сүлжээгээ ашиглан хязгаарлалтыг хакердахаар оролдсон боловч нэвтрэх боломжгүй байжээ. “Twitter” хуудсанд хязгаарлалт тавихаас өмнө Селахаттин Демирташ өөрийг нь баривчилсан тухай жиргэсэн байна.
Одоогоор гадаадад байгаа Туркийн парламентын гишүүн /Ардын ардчилсан нам/ Эртугрул Кюркчу хэлэхдээ ”энэ баривчилгаа нь хууль бус бөгөөд эрүүгийн байцаан шийтгэх хууль, эрүүгийн хууль, Үндсэн хуулиас гадуур үйлдэж буй ажиллагаа юм. Энэ нь Ардын ардчилсан намын гишүүдийг хууль бусаар дарамталж буй хэлбэр мөн” гэсэн байна. Мөн тэрбээр "Туркийн Засгийн газар нацист маягийн дарангуйлал руу явж байна" гэж мэдэгдлээ.
Д.Нямтулга
