Улаанбаатар
ДУНДГОВЬ: Гэнэтийн аадар бороо орох төлөвтэй байгаа тул сонор сэрэмжтэй байхыг анхааруулав
ОРОН НУТГИЙН МЭДЭЭ | ДУНДГОВЬ
Мандалговь, 2024 оны наймдугаар сарын 12 /МОНЦАМЭ/. УЦУОШТ-ийн мэдээлснээр
энэ сарын 5-12-нд Дундговь аймгийн Сайхан-Овоо, Эрдэнэдалай, Цагаандэлгэр,
Дэлгэрхангай сумын нутагт 34,5-84,8 мм, Сайнцагаан, Гурвансайхан, Луус, Хулд
сумын нутагт 19,5-27,1 мм, бусад суманд 7,3-17,0 мм бороо орсон.
8 дугаар сарын 8-нд 22 цагийн орчим хүчтэй бороо, мөндөр орж, нөөлөг салхи тавьсны улмаас Сайнцагаан сумын Үйзэн багийн нутагт хоёр айл усанд автсаныг сумын Онцгой комисс, мэргэжлийн анги, аймгийн ОБГ-ын алба хаагчид шуурхай ажиллаж, нүүлгэн шилжүүллээ.
Мөн хашаатай байсан бог малыг аюулгүй газарт шилжүүлэх, хорогдсон малын сэг зэмийг
түүвэрлэн устгах ажлыг гүйцэтгэсэн
юм.
Ирэх долоо хоногт нийт
нутгаар дуу, цахилгаантай бороо орох төлөвтэй байгааг УЦОШТ-өөс мэдээлж, малчид, иргэдийг сонор сэрэмжтэй байхыг анхаарууллаа.
Ялангуяа энэ сарын 15, 16-нд ихэнх нутгаар дуу цахилгаантай аадар бороо орох ба борооны өмнө салхи түр зуур ширүүсэх төлөвтэй байна. Агаарын хэм 15, 16-нд бага зэрэг сэрүүсэх бол бусад хугацаанд шөнөдөө +11-16 хэм, өдөртөө +21-26 хэм дулаан байна.
