Улаанбаатар
АРХАНГАЙ: 17 хүртэлх насны хүүхдийн эрт илрүүлэг үзлэг хангалтгүй байна
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. Эрүүл мэндийн сайдын 2022 оны А/139 дүгээр тушаал, Эрүүл мэндийн даатгалын үндэсний зөвлөлийн 2022 оны 6 дугаар тогтоолын дагуу 5 дугаар сарын 1-нээс эхлэн эрт илрүүлэг үзлэгийг орон даяар зохион байгуулж эхэлсэн.
17 хүртэлх насны хүүхдийн эрт илрүүлэг үзлэгийг сум, өрхийн
эрүүл мэндийн төвүүдэд, 18-аас дээш насны иргэдийн үзлэгийг аймгийн Нэгдсэн
эмнэлэг дээр хийж байна. Эрт илрүүлэг үзлэгийн хамрагдалтаар улсын хэмжээнд Архангай
аймаг хангалтгүй үзүүлэлттэй гурван аймгийн нэг болж байгааг аймгийн ЭМГ-аас
мэдээллээ. Үүний шалтгааныг үзэхдээ 17 хүртэлх насны хүүхдийг эрт илрүүлэг үзлэгт
сум, өрхийн ЭМТ-үүд хангалтгүй хамруулж байгаа, мөн 18-30 насны залуучууд
Нэгдсэн эмнэлэгт эрт илрүүлэг үзлэгтээ хангалтгүй хамрагдаж байгаатай холбоотой
гэж үзжээ.
Тухайлбал, хамрагдалтын хамгийн бага
хувьтай байгаа сум, өрхийн ЭМТ-үүдийн нэрийг дурдлаа. 5 хүртэлх насны хүүхдийн
хамрагдалт Цахир сумын болон Эрдэнэбулган сумын "Ар мөнгөн чагнуур" ЭМТ-үүд 0 хувьтай, Өгийнуур, Цэцэрлэг, Цэнхэр,
Ихтамир, Хайрхан, Төвшрүүлэх, Хангай, Хашаат, Өлзийт, Булган, Батцэнгэл,
Өндөр-Улаан, Эрдэнэбулган сумын 6-р багийн болон "Ар-манал" ӨЭМТ-үүд
0,7-25 хувьтай байгаа нь энэ насны хүүхдийг огт хянадаггүй гэж дүгнэж болохоор
байгааг дурдлаа.
6-17 насны хүүхдийн хамрагдалт Ихтамир
суманд 0,6, Цэцэрлэг 0,9, Ар-Манал ӨЭМТ 2,6, Өгийн сумын ЭМТ 3,5, Өндөр-Улаан
5, Цэнхэр 7, Цахир 12, Хангай 13, Чулуут 13, Эрдэнэмандал 15, Төвшрүүлэх 16,
Жаргалант 19, Ар-Мөнхжин ӨЭМТ 20, Хайрхан сум 21, Хашаат 25, Ар мөнгөн чагнуур
ӨЭМТ 27, Булган сум 28 хувьтай байгаа нь маш хангалтгүй байгааг мэдээллээ.
Иймд ЭМГ-аас хүүхдийн эрт
илрүүлэг үзлэгийг эрчимжүүлэх ажлыг зохион байгуулж, тайлан мэдээ явуулахыг сум, өрхийн эрүүл мэндийн төвүүдэд чиглэл болгов.
