БНСУ, АНУ-ын цэргийн сургуулилалт Солонгос хоорондын харилцаанд сөргөөр нөлөөлнө
ДЭЛХИЙН МЭДЭЭ | УЛС ТӨРСӨҮЛ. /Yonhap/.
БНСУ, АНУ-ын хамтарсан жил тутмын
зуны цэргийн сургуулилалт Солонгос хоорондын цаашдын харилцаанд сөргөөр
нөлөөлнө гэж БНАСАУ-ын удирдагч Ким Жөн Уны охин дүү Ким Ё Жон ням гарагт
анхааруулжээ.
БНАСАУ БНСУ-тай
холбоо тогтоох харилцаа холбооны шугамаа удаан хугацааны дараа сэргээсэн нь
талуудын хоорондын хурцадмал байдлыг намжаах найдлага төрүүлснээс хэдхэн
хоногийн дараа Ким Ё Жон Солонгосын төв цахилгаан мэдээний агентлагаар /KCNA/
дамжуулан ийнхүү мэдэгджээ.
“Өнөөгийн энэ чухал
цаг үед цэргийн сургуулилалт хийвэл Солонгос хоорондын харилцааг урагшлуулж,
итгэлцлийг сэргээхийг зорьж буй БНАСАУ, БНСУ-ын удирдагчдын хүсэл зоригийг ноцтой
сүйтгэсэн таагүй үйлдэл болох нь гарцаагүй юм” гэж тэрбээр мэдэгдсэн байна.
Мөн, “Манай Засгийн
газар, Зэвсэгт хүчин БНСУ-ыг дайсагнасан дайны сургуулилалтаа дахин явуулах уу,
зоримог шийдвэр гаргах уу гэдгийг нягт ажиглах болно. Найдвар, цөхрөлийн алийг
нь сонгох нь биднээс хамаарахгүй” гэж нэмж хэлжээ.
БНСУ, АНУ-ын жил
бүрийн зун хийдэг ээлжит цэргийн сургуулилалт наймдугаар сард болох төлөвтэй
байгаа ч Сөүлийн Батлан хамгаалах яамнаас мэдээлснээр, холбоотнууд сургуулиа
хэзээ, хэрхэн явуулах талаар зөвлөлдөж байгаа ажээ.