Монголоос Турк руу арьс шир, махан бүтээгдэхүүн экспортлох боломжийг судална

МОНГОЛЫН МЭДЭЭ | ГХЯ-НЫ МЭДЭЭ
munkhbaatar@montsame.gov.mn
2021-02-22 12:23:04
@s_munkhbaatar

Улаанбаатар /МОНЦАМЭ/. Монгол Улсаас Турк улсад суугаа Онц бөгөөд Бүрэн эрхт Элчин сайд Р.Болд Туркийн Хөдөө аж ахуй, ойн сайд Бекир Пакдемирлитай өнөөдөр уулзжээ. 


Уулзалтаар, Монгол Улс, Бүгд Найрамдах Турк Улс хооронд 2018 онд байгуулсан Хөдөө аж ахуйн салбарт хамтран ажиллах тухай санамж бичгийг хэрэгжүүлэхэд хоёр талаас идэвх гаргах, үүний тулд яам хоорондын хамтын ажиллагааны ажлын баг байгуулах чиглэлд ажиллахаар тохирсон байна.


Энэ хүрээнд, Монголоос Турк руу арьс, шир, өлөн гэдэс, мах махан бүтээгдэхүүн экспортлох боломжийг судлахын тулд экспортын бүтээгдэхүүний эрүүл ахуй, хорио цээрийн асуудлаар Монголын Мал эмнэлгийн ерөнхий газар, Туркийн Хүнс, хяналтын ерөнхий газар хооронд холбоо тогтоож, цахим уулзалт хийхээр болов.


Элчин сайд Р.Болд, малыг эрүүлжүүлэх төсөл хэрэгжүүлэх, малын вакцин үйлдвэрлэх, хүлэмжийн технологи нийлүүлэх чиглэлээр хамтран ажиллах хзсэлтийг илэрхийлж, Туркийн тал энэ оны тавдугаар сард болох Дэлхийн мал, амьтны эрүүл мэндийн байгууллагын 88 дугаар чуулга уулзалтын үеэр Монгол Улсын баруун бүсийг малын гоц халдварт шүлхий өвчингүй тайван бүсээр хүлээн зөвшөөрүүлэх Монголын өргөдлийг дэмжихээ илэрхийлсэн тухай ГХЯ-наас мэдээллээ. 

Холбоотой мэдээ