“Ачтан-Элит клиник" эмнэлгээр үйлчлүүлсэн хоёр иргэний түргэвчилсэн оношлуурын шинжилгээ сөрөг гарчээ

ОРОН НУТГИЙН МЭДЭЭ | ТӨВ
tuv@montsame.gov.mn
2021-01-06 16:40:07

 

Төв /МОНЦАМЭ/. “Ачтан-Элит клиник" эмнэлгээр үйлчлүүлсэн хоёр иргэн Төв аймгийн Заамар болон Эрдэнсант суманд очсоныг тусгаарлалтад авч,  түргэвчилсэн оношлуураар шинжилгээ авахад хариу нь сөрөг гарсан байна.

Тодруулбал, өнгөрсөн оны 12 дугаар сарын 15-22-ны өдөр тус эмнэлгийн Дотрын тасагт хэвтэн эмчлүүлсэн нэг иргэн Төв аймгийн Заамар сумын Шижир Алт гуравдугаар багт очсон байна. Тухайн иргэн эмнэлгээс гарахдаа  PCR шинжилгээ өгөхөд хариу нь сөрөг гарсан учир сум руугаа  явжээ. Ийнхүү аймгийн Эрүүл мэндийн газрын тандалт судалгааны баг өчигдөр очиж  тухайн иргэнээс болон гэр бүлийн хүнээс нь түргэвчилсэн оношлуураар шинжилгээ авахад хариу нь сөрөг гарчээ.

Мөн 2020 оны 12 дугаар сарын 17-нд “Ачтан-Элит клиник"  эмнэлэгт рентген зураг авахуулсан иргэн Эрдэнсант суманд очсон. Тухайн иргэнээс болон гэр бүлийн хүнээс нь түргэвчилсэн оношлуураар шинжилгээ авахад хариу нь сөрөг гарсан байна. Ийнхүү эдгээр иргэдэд одоогоор ямар нэгэн шинж тэмдэг илрээгүй байгаа бөгөөд гэрийн тусгаарлалтад байгаа аж. Мөн аймгийн Эрүүл мэндийн газрын тандалт судалгааны баг хоёр хонгийн дараа очиж дээрх иргэдээс PCR шинжилгээ авна гэж аймгийн Эрүүл мэндийн газрын дарга С.Мөнхтуяа хэллээ.

Холбоотой мэдээ