Улаанбаатар
НҮБ-ын тэргүүн залуучуудад хандан уриалга гаргав
ДЭЛХИЙН МЭДЭЭ | НИЙГЭМСӨҮЛ. /Yonhap/. НҮБ-ын Ерөнхий нарийн бичгийн дарга Бан Ги Мүн уур амьсгалын өөрчлөлт, хүний эрх зэрэг дэлхий нийтийг хамарсан асуудлуудад дуу хоолойгоо нэгтгэхийг дэлхийн улс орнуудын залуучуудад хандан уриаллаа.
Гионжу хотод болсон НҮБ-ын Олон нийтийн мэдээллийн газрын бага хурлын нээлтийн үеэр тэрбээр үг хэлэхдээ “Бүх залуучууд уур амьсгалын өөрчлөлт, хүний эрхийн талаарх үйл хэрэгт дуу хоолойгоо өргөх хэрэгтэй”-г онцлоод “дэлхий ертөнцийг сайн сайхан болгохын тулд тэд илүү их хариуцлага хүлээх ёстой” гэдгийг тэмдэглэн хэлэв.
Дэлхий даяарх хэдэн зуун их сургуулиуд болон дунд сургуулиудад зочилж, оюутан залуустай уулзаж байсан тухайгаа тэрбээр дурдаад “тэдний зарим нь надаас уур амьсгалын өөрчлөлт гэх мэт олон улсад тулгамдаад байгаа асуудлуудыг хэрхэн шийдвэрлэж болох талаар зөвлөгөө авч, энэ үйл хэрэгт дуу хоолойгоо нэгтгэх хүсэлтэй байгаагаа илэрхийлсэн. Харин би тэдэнд “дуу хоолойгоо дэлхийн улс орнуудын удирдагчдын сонорт хүртэл нь чанга хүчтэй болгох хэрэгтэй гэж зөвлөсөн" хэмээн ярилаа.
Бан Ги Мүн дэлхий нийтэд боловсрол олгох нь чухал гэдгийг онцоллоо. Тэрбээр “бид хүүхдүүдийг сургуульд сургаж, хүмүүжил олгохын тулд чадах бүхнээ хийх ёстой” гээд шашин шүтлэг, арьс өнгө, угсаатны бүлэг, хөдөлмөрийн бэрхшээл, бэлгийн чиг баримжаа, хүйс зэргээс үүдэн боловсролын салбарт гарч буй тэгш бус байдлыг арилгахыг уриалжээ.
“Тэд бүгд тэгш эрхтэй байж, тэгш хүндэтгэл хүлээх ёстой” хэмээн хэлэхэд хуран цугласан олон нижигнэтэл алга ташсан байна.
Бан Ги Мүн ирэх оны БНСУ-ын ерөнхийлөгчийн сонгуульд хүчтэй өрсөлдөгч байх болно гэж олон нийт үзэж байгаа бөгөөд энэ талаар ямар мэдэгдэл хийхийг Өмнөд Солонгосын хэвлэлийнхэн анхааралтай ажиглаж байна.
Бан Ги Мүн хэлэхдээ, одоогийн Ерөнхийлөгч Пак Гын Хэгийн Африк тивд хийж буй айлчлал нь тус тивийн хөдөө аж ахуй, нийгмийн хөгжилд үнэтэй хувь нэмэр оруулна гэж үзэж байгаагаа илэрхийлжээ.
Өнгөрсөн долоо хоногт БНСУ-ын ерөнхийлөгчийн сонгуульд өрсөлдөнө гэсэн таамаг дэвшүүлснийхээ дараа тэрбээр мэдэгдэл хийж, энэ оны эцсээр НҮБ-ын Ерөнхий даргын албыг өгснийхөө дараа Өмнөд Солонгосын иргэний хувиар цаашид хэрхэхээ шийднэ гэсэн байна.
Тэрбээр Өмнөд Солонгос болон Японд хийхээр төлөвлөсөн зургаан өдрийн айлчлалаа дуусгаад Нью-Йоркт буцаж ирнэ.
Д.Нямтулга
