Улаанбаатар
ХААН банк цахим машинууддаа ариутгал халдваргүйтгэлийг тогтмол хийж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Улсын онцгой комиссоос үйлчилгээний байгууллагуудын ариутгал цэвэрлэгээг тогтмол хийхийг онцгойлон үүрэг болгоод буй энэ үед ХААН Банк бэлэн мөнгөний орлого зарлагын Экспресс банк, АТМ, киоск машинууддаа хэрхэн ариутгал цэвэрлэгээ хийж байгааг сурвалжиллаа.
Хатуу хөл хорио тогтоогоод байгаа энэ үед иргэд зайлшгүй шаардлагаар хүнсээ цуглуулахаар гэрээсээ гарч байна. Мөн банкны үйлчилгээг гар утас интернэт ашиглан авч байгаагаас гадна АТМ киоск машинаас очиж авах шаардлага гарч байгаа учир гэрийнхээ ойролцоох АТМ, Экспресс банкаар үйлчлүүлэх нь их байна.
Өнөөдөр Монгол Улсын хэмжээнд хийгдэж байгаа интернэт банкны нийт гүйлгээний 44 хувь, ATM-ын гүйлгээний 88 хувийг ХААН Банк дангаар гүйцэтгэж, бэлэн бус төлбөр тооцоо, цахим банкны хамгийн том дэд бүтэц сүлжээг бий болгоод байгаа билээ. Тус банкны хувьд Монгол орон даяар нийт 1400 орчим АТМ, 100 гаруй киоск машин, 180 орчим экспресс банкаар иргэдэд үйлчилж байна. Үүнээс нийслэлийн хэмжээнд 197 байршилд 920 гаруй АТМ, орлого зарлагын экспресс банк, 68 киоск машин иргэдэд үйлчилж байна. Зайнаас үйлчилгээ авах боломжтой эдгээр төхөөрөмжийн ариутгал цэвэрлэгээг “Ньюком проперти” компани хариуцан ажилладаг аж.
Бүх нийтийн бэлэн байдал зарласан энэ өдрүүдэд тус компани дүүрэг бүрт нэг баг гарган, байршил бүрт байгаа Экспресс банк, АТМ, киоск машинуудын ариутгал цэвэрлэгээг өдөр бүр тогтмол цагт тойрч цэвэрлэж байгаа юм. Тэгэхдээ хамгаалалтын хувцастай хүмүүс стандартын дагуу цэвэрлэгээ ариутгалыг хийж, хүний гар хүрэлцдэг бүхий л хэсгүүдийг жавелиний уусмалаар ариутгаж, төхөөрөмжийн эргэн тойрны хэсгүүд, гадна дотны орчны цэвэрлэгээг хийж байна.
ХААН Банкнаас сүүлийн жилүүдэд цахим шилжилтэд хөрөнгө оруулж, олон бүтээгдэхүүн, үйлчилгээгээ цахимжуулсны үр дүнд өнөөдөр тус банкаар дамжиж буй нийт гүйлгээний 95 хувь нь цахимаар хийгдэж байгаа тул харилцагчдад банкны үйлчилгээг салбар нэгжид ирэлгүй зайнаас авах нөхцөлийг бүрэн хангаж чаджээ. Мөн банкны цахим сувгуудын хэвийн ажиллагааг хангахад банкнаас тогтмол хяналт тавьж ажиллаж байгаа тул иргэд өөрт ойр АТМ, киоск, экспресс банкаар хоорондын зай баримтлан үйлчлүүлэх мөн бэлэн мөнгө төхөөрөмжтэй харьцсан тохиолдолд халдваргүйтгэл байнга хийж хариуцлагатай хандахыг зөвлөж байна.
